"Pandemııadan kóz jumǵan dárigerlerdiń rýhyna taǵzym etý - áriptestik paryzymyz"

Túrkistan oblystyq​ týberkýlezge qarsy dıspanseriniń​ bas dárigeri​ ​Bolat Saǵymbekov dárigerler ótkizgen aksııaǵa qatysty pikir bildirdi.

– Áleýmettik jelide Prezıdentimiz jarııalaǵan jalpyulttyq aza tutý kúni koronavırýs qurbandaryn eske alý boıynsha bizdiń áriptesterimizdiń kóshedegi únsizdik aksııasy keńinen taralyp jatyr. Bul is-áreketti synǵa alyp jatqan keıbir azamattarymyz da bar, - deıdi ol.

Ol Shymkent qalasynda ornalasqan Túrkistan oblystyq týberkýlezge qarsy dıspanseri ujymynyń atynan resmı túrde málimdemesin jasady.

– Atalmysh shara Ulttyq medısınalyq assosıasııasynyń tóraıymy Sadyqova Aıjan Begaıdarqyzynyń barsha medısına qyzmetkerlerine tastaǵan úndeýin qoldaý maqsatynda, sum indetpen kúresip kóz jumǵan barsha áriptesterimizdiń rýhyna taǵzym etý úshin jasaǵan bizdiń ortaq sheshimimiz.
Aty jaman aýrýmen arpalysyp ortamyzdan ketken qanshama mamannan, áriptes-dostan, qyzmettes-joldastarymyzdan aıyryldyq. Kóz aldymyzdan ketse de, júregimizde qaldy, - dep jazdy jelidegi paraqshasynda.

Ol óz sózinde Aza tutý kúni marqumdardyń rýhyna taǵzym etý áriptestik paryz sanaıtynyn atap ótti.

– Olardyń árbiri osyndaı qurmetke laıyq dep sanaımyz.
О́z kezegimde, bul sharany uıymdastyrýǵa jergilikti ákimdiktiń de, ortalyq bılik oryndarynyń da eshqandaı qatysy joq ekendigin jetkizemin, - dep sózin túıindedi Bolat Saǵymbekov.