"Shyǵarmashylyqqa oryn qalmady". Qazaqstan kınomotograftary Toqaevqa resmı hat joldady

Qazaqstanǵa eńbegi sińgen kıno salasynyń maıtalmandary prezıdent Qasym-Jomart Toqaevqa  resmı hat joldady.

"Qurmetti Qasym-Jomart Kemeluly!

О́zińizge málim, eldiń kıno qaýymdastyǵynda jikke bólinýshilik bolyp jatyr. Bir jyldan beri daý-damaı men teketirester basylmaı keledi.

Kásibı kınogerler daý-damaıdan arylmaı otyr. Naǵyz shyǵarmashylyqqa oryn qalmady. Biz munyń bári osy sala mınıstrliginiń oılanbaı jasaǵan áreketteriniń saldary dep sanaımyz.

2019 jyldyń naýryzynda, «Ulttyq kınony qoldaý memlekettik ortalyǵy» KAQ qurylyp, oǵan respýblıkalyq kıno óndirisiniń barlyq negizgi máselelerin sheshý quzyry berildi.

Aqyrynda «Qazaqfılm» Ulttyq kınostýdııasyna qajetti nazar aýdarylmaı qaldy, al Sybaılas jemqorlyqpen kúres Agenttigi Ulttyq kınony qoldaý ortalyǵynyń jetekshilerine qarsy qylmystyq is qozǵady. Onyń qalaı aıaqtalatyny ázirge belgisiz, tergeý jalǵasyp jatyr. Dese de osynyń ózi naǵyz soraqylyq bolyp otyr.

«Qazaqfılm» Ulttyq kınostýdııasyna keler bolsaq, ótken jyldyń tamyz aıynda oǵan prezıdent bolyp A.T. Ásenov taǵaıyndalǵan bolatyn. Jarty jyl da bolmaı, QR Mádenıet jáne sport mınıstriniń A. Ásenovti qyzmetinen bosatý týraly buıryǵy shyqty.

Mınıstrlikten tys kásibı qoǵamnyń aralasýymen mınıstrdiń ol sheshimi joqqa shyǵarylǵan. Alaıda, A. Ásenovti qyzmetinen bosatý týraly buıryq qaıtadan shyǵyp, bul joly oǵan aldap qol qoıdyrdy.

9 maýsym kúni A.T. Ásenov myrza jáne kınostýdııanyń basqarýshy dırektory Q.Á. Tórebaımen birge Nur-Sultanǵa shaqyrylyp, QR Mádenıet jáne sport mınıstrligi olarǵa basqa jumysqa aýysatynyn habarlady.

Demek A. Ásenov Ulttyq kınony qoldaý ortalyǵynyń tóraǵasy, al Q. Tórebaı «Qazaqfılm» kınostýdııasynyń prezıdenti bolyp taǵaıyndalatynyn málimdegen. Eshbir kúmánderi bolmaǵan A. Ásenov pen Q. Tórebaı aryz jazyp, Almatyǵa ushyp ketken.

Bir aı únsizdikten keıin, «Qazaqfılm» prezıdenti bolyp rejısser Aqan Sataevty taǵaıyndap otyr.

Biz A. Sataev myrzaǵa esh qarsylyǵymyz joq. Alaıda Mádenıet jáne sport mınıstrligi qyzmetkerleri tarapynan qyzmettik etıka óreskel buzylyp otyr.

A. Ásenov «Qazaqfılmniń» prezıdenti qyzmetinde bar bolǵany 9 aı ǵana otyrdy. Osyndaı qysqa merzim ishinde, onyń ústine, mınıstrlik tarapynan esh qoldaý bolmaı otyrǵanda, qandaıda bir nátıjege qol jetkizý múmkin be?

A. Ásenov ta, Q. Tórebaı myrza da QR eńbek sińirgen qaıratkerleri. Olar kıno salasyna bar ómirlerin sarp etken, kásibı ortada óte bedeldi azamattar, olarǵa osyndaı qarym-qatynas tanytý durys pa?

Mádenıet mınıstrligi jaýapty qyzmetkerleriniń mundaı áreketteri júıeli túrde oryn alyp otyrǵanyna nazar aýdartyp, kınogerlerdi eki topqa bólý áreketteriniń saldarynan bul salada daý-damaılar órship turǵanyn aıtqymyz keledi.

Jaqynda Qazaqstan Kınogerler odaǵynyń tóraǵasy Ermek Tursynov, osy kıno salasyndaǵy problemalarǵa jeke-jeke toqtalǵan bolatyn. Bul máselege ol óz atynan ǵana emes, shyǵarmashylyq odaqtyń atynan nazar aýdartýǵa tyrysqan. Dese de bılik qurylymdary tarapynan eshqandaı reaksııa bolmady.
Prezıdent myrza! Bul máseleler tek otandyq kıno salasyna ǵana emes, búkil Qazaqstan mádenıetine qatysty bolǵandyqtan, ózińizdiń tikeleı aralasýyńyzdy suraımyz.

Qurmetpen,

Asanáli Áshimov,
QSRO Halyq artısi, QSRO memlekettik syılyǵynyń laýreaty, Eńbek eri.

Nurjuman Yqtymbaev,
Qazaqstannyń halyq artısi, Memlekettik syılyqtyń ıegeri.

Satybaldy Narymbetov,
Qazaqstan Memlekettik syılyǵynyń laýreaty, Eńbek sińirgen qaıratkeri.

Esetjan Qosýbaev,
«Qazaqfılm» AQ dırektorlary keńesiniń múshesi.

Bolat Qalymbetov,
Qazaqstannyń Eńbek sińirgen qaıratkeri.

Rústem Ábdirashev,
Qazaqstannyń Eńbek sińirgen qaıratkeri, Jastar odaǵy syılyǵynyń ıegeri.

Anar Qashaǵanova,
Qazaqstannyń Eńbek sińirgen qaıratkeri.
Tasbolat Merekenov,
Qazaqstannyń Eńbek sińirgen qaıratkeri.

Nurlan Sanjar,
Qazaqstannyń Eńbek sińirgen qaıratkeri.

Abaı Qarpyqov,
Kınorejısser" dep jazylǵan resmı hatta.