• USD 468.56

  • EUR 497.56

  • RUB 7.3

  • CNY 67.18

28 Naýryz, 22:31:27
Almaty
+35°

Aqtóbe oblystyq ınfeksııalyq aýrýhananyń bas dárigeri qyzmetin atqarǵan Qalıhan Qozbaǵarovty áriptesteri "ákemizdeı bolǵan jan" dep eske alady. Ol 60 jasynda pnevmonııaǵa shaldyǵyp, kóz jumdy. Búgin Prezıdent Jarlyǵymen Qazaqstannyń Eńbek Eri atandy.

Qalıhan Qozbaǵarov Aqtóbe oblysynda dúnıege kelgen. 1983 jyly Aqtóbe memlekettik medısına ınstıtýtyn, emdeý fakýltetin bitirgen. Internatýrany aıaqtaǵannan keıin Hromtaý qalasynyń aýdandyq aýrýhanasyna dáriger – ınfeksıonıst qyzmetine jiberildi.

1985 jyly nevropatolog – dáriger bolyp qyzmet atqardy. 1997 jyldan bastap Hromtaý aýmaqtyq – medısınalyq birlestiginiń bas dırektory, 1999 jyldan bastap Hromtaý aýdandyq densaýlyq saqtaý bóliminiń meńgerýshisi, 2003 jyldan 2012 jylǵa deıin Hromtaý ortalyq aýdandyq aýrýhanasynyń bas dárigeri bolyp eńbek etti. 2012 jyl jeltoqsan aıynan kúni búginge deıin Aqtóbe oblystyq ınfeksııalyq aýrýhananyń bas dárigeri qyzmetin atqardy.

"Hromtaý aýdannyń densaýlyq saqtaý júıesinde jumys istegen kezinde Q. Qozbaǵarov ózin uıymdastyrýshy jáne quzyretti basshy qabiletti bilikti maman retinde kórsetti. Onyń basshylyǵymen aýdannyń densaýlyq saqtaý salasy jyl qorytyndysy boıynsha birneshe ret úzdik dep tanylyp, oblysta birinshi orynǵa ıe boldy. 2001 jyly "Qazaqstan Respýblıkasynyń táýelsizdigine 10 jyl" medalimen marapattaldy. 2002 jyly Qazaqstan Respýblıkasynyń dárigerleri men provızorlarynyń ekinshi seziniń delegaty bolyp saılandy. 2002 jyly "Qazaqstan Respýblıkasynyń densaýlyq saqtaý isiniń úzdigi" tósbelgisimen marapattaldy" dep jazdy oblystyq klınıkalyq ınfeksııalyq aýrýhanasynyń kásipodaq uıymynyń tóraıymy B.Qojıeva.

Áriptesteri Qalıhan Qozbaǵarovtyń ómiriniń sońǵy kúnine deıin aýrýhanada em júrgizgenin aıtyp, eske aldy.

"Qalıhan Qozbaǵarov bar kúsh-jigerin jumysqa arnady. Sonymen birge áriptesterine talapshyl boldy. Biz basshymyzdyń jarqyn beınesin máńgi este saqtaımyz. Shynyn aıtqanda, ol qyzmetke kelgen soń qajetti qural-jabdyq satyp alý, medısınalyq preparattarmen qamtamasyz etý isi jandandy. О́miriniń sońǵy kúnine deıin jumysta júrdi. Em qabyldady, jansaqtaý bólimine túskenge deıin janymyzdan tabyldy. Bir kúni zerthanada tańǵa deıin júrgen edim. Ol da úıine ketpedi, birge boldy. Senbi, jeksenbi kúni de aýrýhanada júretin. Ákemizdi, týǵan baýyrymyzdy joǵaltqandaı kúı keship júrmiz" dedi oblystyq ınfeksııalyq aýrýhananyń bólim meńgerýshisi Nurjamal Esenǵalıeva.

Derekkóz: QazAqparat 

"Qamshy" silteıdi

Qate tapsańyz, qajetti bólikti tańdap ctrl+enter basyńyz.

Pikir qaldyrý

pikir