11 Shilde, 2020 NEWS

Shetel mamandary: Qazaqstandaǵy "belgisiz pnevmonııa" – is júzinde koronavırýs

Kórneki sýret

Ulybrıtanııalyq Daily Mail basylymy "Qytaı jáne Ulybrıtanııa densaýlyq saqtaý mamandary Qazaqstanda taralyp jatqan belgisiz pnevmonııanyń is júzinde COVID-19 ekenin aıtty" degen aqparat taratty. Bul týraly Qamshy tilshisi habarlaıdy.

Álemdik jetekshi buqaralyq aqparat quraldary "Qazaqstanda ólim mólsheri koronavırýstan da joǵary belgisiz pnevmanııa paıda boldy" dep jarysa aqparat jarııalaǵannan keıin, Londonda shyǵatyn Daily Mail basylymy qytaılyq jáne ulybrıtanııalyq medısına mamandarynan suhbat alǵan. 

– Búgin keshte Beıjińdegi Qytaıdyń bas epıdemıology Ý Szıýnıý Qazaqstanda taralǵan "belgisiz pnevmonııa" epıdemıologııalyq turǵydan COVID-19 dep sanaıtynyn jetkizdi, – dep habarlady Daily Mail.

Bas epıdemıolog Qazaqstan týraly jańalyqtardy baıqaǵanyn jáne ınternetten tıisti aqparattardy oqyǵanyn aıtqan.

Ol sonymen birge Qazaqstandaǵy "belgisiz pnevmonııadan" bolǵan ólim-jitim deńgeıi COVID-19-ǵa uqsas ekenin jetkizgen.

Ulybrıtanııalyq mamandar da Qazaqstandaǵy jaǵdaılardyń anyqtalmaǵan COVID-19 ınfeksııasy dep senetinin jarııalaǵan. Ýorvık ýnıversıtetiniń vırýsology jáne onkology professor Loýrens Iаng MailOnline-ǵa suhbat berip, ólimge ákeletin "belgisiz pnevmonııanyń" COVID-19-ǵa qatysy joqtyǵyna sený qıyn ekenin málimdegen.

Buǵan deıin qazaqstandyq neırohırýrg dáriger Myńjylqy Berdiqojaev "pnevmonııadan qaıtys bolyp jatqan adamdardyń 99 paıyzynyń ólimine koronavırýs sebep" dep sanaıtynyn aıtqan.

Juma kúni Dúnıejúzilik densaýlyq saqtaý uıymy Qazaqstandaǵy "belgisiz pnevmonııany" is júzinde anyqtalmaǵan COVID-19 dep málimdegen

Al Qazaqstannyń densaýlyq saqtaý mınıstri Alekseı Soı kerisinshe "2020 jyly pnevmonııadan 1172 adam qaıtys boldy" dep málimdegen. Alekseı Soı keltirgen derekke saı, pnevmonııadan qaıtys bolǵandar koronavırýs óliminen bes esege kóp, sebebi resmı statıstıka boıynsha qazirge deıin Qazaqstanda COVID-19-dan kóz jumǵandar sany 264.

Oǵan qosa, 3 shilde kúni QR bas sanıtar dárigeri Aıjan Esmaǵambetova 2020 jyldyń alǵashqy alty aıynda 1772 adamnyń, maýsymda 628 adamnyń pnevmonııadan qaıtys bolǵanyn aıtqan. Bul esep boıynsha, pnevmonııadan kóz jumǵandar COVID-19-dan qaza tapqandardan 7 ese kóp.

Osy derekterge baılanysty, ıaǵnı resmı statıstıkalar boıynsha, pnevmonııa ólim-jitim mólsheri COVID-19-dan kóz jumǵandardan bes ese, tipti, jeti esege deıin kóp bolýyna baılanysty sheteldik iri BAQ-tar "Qazaqstanda ólim mólsheri koronavırýstan da joǵary, qaýipti vırýs tarap jatyr" degen aqparatty jarysa taratty. Tipti, keıbir elder azamattaryna Qazaqstannan abaılaý týraly eskertýler jasaǵan.

Qate tapsańyz, qajetti bólikti tańdap ctrl+enter basyńyz.

Banner

Pikir qaldyrý

pikir