"Pnevmonınıa" dıagnozy Qazaqstandy halyqaralyq daýǵa qaldyrdy

Batystyń jetekshi iri basylymdary "Qazaqstanda ólim mólsheri COVID-19-dan da joǵary belgisiz vırýs paıda boldy" dep jarysa jazdy.

Álemdik iri buqaralyq aqparat quraldary CNN, The Mirror, Daily Express, Business Insider, ITV, The Sun gazeti jáne nemistiń jetekshi DW sekildi aqparat resýrstary "Qazaqstanda koronavırýsqa qaraǵanda qaýipti ári belgisiz pnevmonııa keńinen taralyp jatyr" degen mazmunda aqparat jarııalady.

Bul derekter Qazaqstannyń densaýlyq saqtaý mınıstri Alekseı Soıdyń "2020 jyldyń alǵashqy jarty jyldyǵynda pnevmonııadan 1172 adam qaıtys boldy" degen málimdemesinen keıin paıda boldy.  Alekseı Soı keltirgen derekke sáıkes, pnevmonııadan qaıtys bolǵandar koronavırýs óliminen bes esege kóp, sebebi resmı statıstıka boıynsha qazirge deıin Qazaqstanda COVID-19-dan kóz jumǵandar sany 264.

Bir qyzyǵy, 3 shilde kúni QR bas sanıtar dárigeri Aıjan Esmaǵambetova 2020 jyldyń alǵashqy alty aıynda 1772 adamnyń, maýsymda 628 adamnyń pnevmonııadan qaıtys bolǵanyn aıtqan. Bul esep boıynsha, pnevmonııadan kóz jumǵandar COVID-19-dan qaza tapqandardan 7 ese kóp.

Osylaısha, Alekseı Soı men Aıjan Esmaǵambetova bergen statıstıkalar ártúrli.

Osydan keıin alǵash bolyp Qytaı elshiligi "osy jyldyń birinshi jartyjyldyǵynda Qazaqstanda 1772 adam pnevmonııadan ajal qushty, tek maýsym aıynda ǵana 628 adam óldi, onyń ishinde Qytaı azamattary da bar" dep Qytaı azamattaryna dabyl qaqqan. 

Brıtanııalyq The Mirror basylymy " koronnavırýstan da qaýipti, ólimge ákeletin belgisiz pnevmonııa Qazaqstanda  tez taralyp jatyr" dep málimdese, CNN telearnasy "Qazaqstan densaýlyq saqtaý mınıstrligi jáne basqa agenttikter salystyrmaly zertteý júrgizip jatyr jáne pnevmonııa vırýsynyń sebebi belgisiz" dep habarlaǵan.

Business Insider, The Sun, ITV jáne germanııalyq jetekshi BAQ DW " Qazaqstanda COVID-19 ólim mólsherinen anaǵurlym joǵary aýrý tarap jatyr" degen taqyryppen maqala jarııalaǵan. The Express basylymy "Qazaqstanda  belgisiz pnevmonııanyń 32 000 oqıǵasynan keıin Qytaı dabyl qaǵýda. Ortalyq Azııa elinde ólim-jitim deńgeıi koronavırýstan áldeqaıda joǵary belgisiz pnevmonııa paıda boldy" dep aqparat taratqan.

Al, ulybrıtanııalyq Daily Mail basylymy " Qazaqstanda belgisiz vırýs paıda boldy, myńdaǵan adamdar aýyryp, qaıtys bolyp jatyr" degen mazmundaǵy taqyryppen jańalyq jarııalaǵannan keıin, kóp ótpeı ol taqyrypty ózgertip " Qytaı densaýlyq saqtaý mamandary Qazaqstanda taralyp jatqan belgisiz pnevmonııany shyn máninde COVID-19 dep sanaıdy" dep aqparat taratqan.

– Búgin keshte Beıjińdegi Qytaıdyń bas epıdemıology Ý Szıýnıý Qazaqstanda taralǵan «belgisiz pnevmonııa» epıdemıologııalyq turǵydan COVID-19 dep sanaıtynyn jetkizdi,– dep málimdegen Londonda shyǵatyn basylym.

Bas epıdemıolog Qazaqstan týraly jańalyqtardy baıqaǵanyn jáne ınternettegi tıisti aqparattardy oqyǵanyn aıtqan.

Ol sonymen birge Qazaqstandaǵy «belgisiz pnevmonııadan» bolǵan ólim-jitim deńgeıi COVID-19-ǵa uqsas ekenin jetkizgen.

Al, Ulybrıtanııalyq maman da Qazaqstandaǵy jaǵdaılardyń anyqtalmaǵan COVID-19 ınfeksııasy dep senetinin jarııalaǵan. Ýorvık ýnıversıtetiniń vırýsology jáne onkology professor Loýrens Iаng MailOnline-ǵa suhbat berip, " belgiszi pnevmonııanyń" COVID-19-ǵa qatysy joqtyǵyna sený qıyn ekenin málimdegen.

Qazaqstandyq neırohırýrg dáriger Myńjylqy Berdiqojaev "pnevmonııadan qaıtys bolyp jatqan adamdardyń 99 paıyzynyń ólimine koronavırýs sebep" dep sanaıdy.

Qazaqstan qoǵamynda bılik koronavırýs statıstıkasyn azaıtyp, olardy pnevmonııa dep kórsetip jatyr degen pikir bar. Oǵan qosa, resmı statıstıka boıynsha, pnevmonııadan qaıtys bolǵandardyń sany COVID-19-dan kóz jumǵandardan bes ese, tipti, jeti esege deıin kóp bolýy, árıne, álemniń nazaryn Qazaqstanǵa aýdarady. Tipti, keıbir elderde "Qazaqstannan abaılańdar, ol memlekette koronavırýstan da qaýipti jańa vırýs paıda boldy" degen eskertýler bastalyp ketken.