10 Shilde, 2020 NEWS

"Qazir ondaı jasta da, jaǵdaıda da emespin". Toqaev qoǵam aldynda "upaı jınaýdy kózdemeıtinin" aıtty

Qazaqstan prezıdenti Qasym-Jomart Toqaev

Búgin, 10 shildede úkimettiń keńeıtilgen otyrysyna qatysqan Qazaqstan prezıdenti Qasym-Jomart Toqaev qoǵam aldynda upaı jınaýdy kózdemeıtinin aıtty. 

Prezıdenttiń sózinshe, osy otyrys aldynda ózine úkimetti túgel otstavkaǵa jiberý týraly keńes berilgen, biraq ol "upaı jınap alýdy kózdemeıtinin" aıtyp, usynystan bas tartqan. 

– Maǵan keıbir aımaqtaǵy jáne vedomstvolardaǵy birinshi basshylardy jumystan bosatý, tipti úkimetti túgel otstavkaǵa jiberý týraly keńes berilgen. "Qoǵam bul áreketińizdi durys qabyldaıdy, upaı jınap alasyz" degen oı aıtyldy. Alaıda maǵan qazir upaı kerek joq. Men jaýapty adamdardy tyńdaýǵa daıynmyn. Biraq halyq aldynda oıyn uıymdastyrýdy jón dep eseptemeımin. Qazir ondaı jasta da, jaǵdaıda da emespin, – dedi Toqaev. 

Prezıdent búgingi ótken otyrys barasynda koronavırýs ınfeksııasyna baılanysty eki aptaǵa engizilgen karantın elde jaǵdaıdy túzemese, úkimettiń qazirgi quramyna baılanysty másele týyndaıtynyn da aıtqan edi. 

Qazaqstanda qazir koronavırýs pen pnevmonııa órship tur. Aýrýhanalarda oryn jetispeıdi, dárihanalarda dári tapshy. Sońǵy aqparatqa saı, elde naýryzda bastalǵan koronavırýsty 55 myńǵa jýyq adam juqtyrǵan. Bılik 5 shildeden bastap eki aptaǵa karantın engizdi. Biraq elde vırýs juqtyrǵandar sany kún saıyn ósip jatyr. Qazaqstan vırýs juqtyrǵandar sany jóninen álemde 31-orynda.

 

Ilmek sózder: Toqaev koronavırýs

Qate tapsańyz, qajetti bólikti tańdap ctrl+enter basyńyz.

Banner

Pikir qaldyrý

pikir