Koronavırýs álemniń qaı elderinde órship tur?

Dúnıejúzilik densaýlyq saqtaý uıymynyń málimetinshe, álemde koronavırýs ınfeksııasyn juqtyrǵandar sany 12 mıllıonǵa jýyqtady. Olardyń 535 myńnan astamy qaıtys boldy.

DDSU ınfeksııanyń taralýy artyp kele jatqanyn aıtyp jatyr. О́tken aptanyń ózinde álem boıynsha 400 myńnan astam adamnan koronavırýs anyqtalǵan. Dúnıejúzilik densaýlyq saqtaý uıymynyń basshysy Tedros Gebreıesýstiń aıtýynsha, indet órshise de búkil álem boıynsha pandemııa shekti deńgeıine áli jetpegen.

Koronavırýstyń taralýy boıynsha eń alda turǵan elder

Úndistanda kún saıyn 20 myńnan astam adamnan COVID-19 tabylyp jatyr. Bul elde sońǵy táýliktiń ózinde 24 248 adam osy indetti juqtyrǵan. Qazir Úndistan qaıtys bolǵandar sany boıynsha álemde 8-orynda tur.

Brazılııanyń densaýlyq saqtaý mınıstrliginiń málimetinshe, sońǵy táýlikte elde 38 myńǵa jýyq turǵynnan koronavırýs ınfeksııasy anyqtalǵan. Bir kúnde myńnan asa adam qaıtys bolǵan. El prezıdenti Djaır Bolsonarý da koronavırýs juqtyrdy.

Izraıl premer-mınıstri Bınıamın Netanıahýdyń aıtýynsha, aptanyń basynda elde táýligine 500-ge jýyq adamnan KVI anyqtalyp júrgen. Al sońǵy kúnderi bul kórsetkish eki esege artqan. Koronavırýstyń ýshyǵýyna baılanysty bılik eldegi qatań shekteý sharalaryn qaıta engizdi. Bar, klýb, sport zaldar jabylyp, is-sharalarǵa tyıym salyndy.

Ońtústik Koreıa da maýsym aıynyń sońynda elde koronavırýstyń ekinshi tolqyny bastalǵanyn jarııalady. Jergilikti bılik Tedjon qalasyndaǵy sport zaldardy, murajaılar men kitaphanalardy jaýyp, qatań shekteý sharalaryn qaıta engizdi.

Reseıde koronavırýs eldiń qazirgi prezıdenti Vladımır Pýtınniń reıtıngine áser etti. "Levada" ortalyǵynyń málimetinshe, sáýirde onyń reıtıngi 59%, al mamyrda 25% bolǵan. Bul – Pýtın prezıdent bolǵan 20 jyldaǵy eń tómengi kórsetkish. Sarapshylar prezıdent reıtıngisiniń tómendeýinde koronavırýsqa qatysty jaǵdaı mańyzdy ról atqarǵanyn aıtady.

Eýropadaǵy ahýal qalypqa túskenine qaramastan, bul qurlyqtyń keıbir elderinde indet áli taralyp jatyr. Serbııa astanasy Belgradta 10-13 shilde aralyǵynda komendanttyq saǵat engizilgen. Qalada 299 adamnan COVID-19 anyqtalyp, 13 adam qaıtys bolǵan. Osy jaǵdaıǵa baılanysty Serbııanyń 19 qalasy men oblysynda tótenshe jaǵdaı jarııalandy. Karantınniń jańa talaptaryna qarsy shyqqan turǵyndar Belgradtyń ortalyǵynda jappaı tártipsizdik jasady. Narazylyq bildirýshiler polısııaǵa shabýyl jasap, kólikter men qoqys jáshikterin órtegen. Parlament ǵımaratynyń aldyna 5 myńǵa jýyq adam jınalyp, bir bóligi oppozısııa belsendilerimen birge ǵımaratqa basyp kirdi.

Buǵan qosa, Eýro odaq elderinde ekonomıka da tómendegen. Sarapshylar Eýropa ekonomıkasy bıyl 8,3%-ǵa quldyrap, kelesi jyly onyń 5,8%-y qalpyna keledi dep boljap otyr (sáýir aıyndaǵy boljam – 7,4% jáne +6,1% boldy).

AQSh-tyń bas epıdemıology Entonı Faýchı AQSh "koronavırýs ınfeksııasynyń alǵashqy tolqynynda qatty zardap shekti" dep sanaıdy. Bul elde qaıtys bolǵandar sany 130 myńnan asty. Al juqtyrǵandar sany  3 mıllıonnan asty.  

Avstralııadaǵy eń iri qalalardyń biri Melbýrnda koronavırýsqa baılanysty 6 aptalyq karantın engizildi. Buǵan qosa, Vıktorııa men jańa Ońtústik Ýels arasyndaǵy shekara jaýyp tastaldy.