Qazaqstan musylmandary dinı basqarmasynyń tóraǵasy, Bas múftı Naýryzbaı qajy Taǵanuly dári-dármekti qymbattatqandarǵa qatysty pikir bildirdi. Múftıdiń vıdeoúndeýi QMDB Youtube kanalynda jarııalandy.

– Asyl dinimizde qajet ýaqytta kerek kómekti jasaý úlken saýapty amaldyń birine jatady. Syndarly sátte naýqas jandarǵa qajetti dári-dármekti jetkizip, alǵysyn alaıyq. Dári baǵasyn qoldan qymbattatýǵa jol bermeı, jaqsylyq jasaýǵa asyǵaıyq. Al jurtymyzdy juqpaly indetten arashalap alýǵa bar kúshin jumsap, ján-tánimen qyzmet etip júrgen aq halatty abzal jandarǵa jyly sózimizdi arnap, jigerin oıataıyq. Olar úshin árdaıym duǵada bolaıyq, – dedi QMDB tóraǵasy.

Bas múftı kóptegen azamattyń synaq sátinde sadaqa berip, qurban shalyp, duǵa etip jatqandyǵyn atap ótti.

– Sadaqamyz ben qurbandyǵymyz osy bir náýbetti kezeńnen aman-esen ótýge sebepker bolsyn. Biz taǵy da jamaǵatpen duǵa jasap, ıstıǵfar, salaýat aıtýǵa nıet etip otyrmyz. Halyq danalyǵy: «Kóp tilegi kól bolar« deıdi. Barshańyzdy kóppen birge el ıgiligi úshin duǵa jasap, salaýat pen ıstıǵfar aıtýǵa shaqyramyn. Halqymyz: «Aýyr jol – atandy synaıdy, aýyr is – adamdy synaıdy» degen. Rasynda bul synaq jas pen jasamysqa ońaı tıip jatqan joq. Alla Taǵala dertke shaldyqqandarǵa shıpa berip, dám-tuzy taýsylǵan jandardy meıirimine alǵaı. Ámın!, – dedi Naýryzbaı qajy Taǵanuly.

Aıta keteıik, sońǵy ýaqytta dárihanalarda parasetamol, aspırın, sıtramon sekildi dene qyzýyn túsirýge arnalǵan dáriler tapshy. Turǵyndardyń qajetti preparattarǵa qol jetkize almaı dárihanalar aldynda uzyn-sonar kezekte turǵany habarlanǵan bolatyn.

 

"Qamshy" silteıdi

Qate tapsańyz, qajetti bólikti tańdap ctrl+enter basyńyz.

Banner

Pikir qaldyrý

pikir