07 Shilde, 2020 Áleýmet

"О́liktiń ústine bıleý degen osy". Nur-Sultandaǵy otshashýǵa jeli reaksııasy

Sýret áleýmettik jeliden alyndy

Qazaqstan bıligi elde koronavırýs órship, aýyrǵan azamattar aýrýhanǵa syımaı, dárihanalarda dári jetispeı jatqan tusta eldiń eks-prezıdenti Nursultan Nazarbaevtyń 80 jyldyǵy men el astanasy Nur-Sultan qalasynyń kúnin atap ótti. 5 shilde kúni eldiń barlyq aımaǵynda ekinshi ret karantın jarııalaǵan bılik toı-jıynǵa tyıym salǵan bolatyn. Biraq 6 shilde kúndiz Nur-Sultanda bıliktiń uıymdastyrýymen konsert ótip, túnge qaraı oıyn-saýyq arty otshashýǵa ulasty. 

Nur-Sultan qalasy ákimdiginiń málimetinshe, otshashý Esil ózeniniń (Ortalyq saıabaq) jaǵalaýynda, Botanıkalyq baq (Qabanbaı̆ batyr dańǵyly jaǵynan) jáne Pýshkın – Abylaı̆han kósheleriniń qıylysynda bolǵan. Qalalyq ákimdik otshashýǵa bıýdjetten qarjy bólinbegenin, shara demeýshi qarajaty esebinen uı̆ymdastyrylatynyn habarlady. Biraq oǵan kim demeýshi bolǵany esh jerde naqty aıtylmady.
 
6 shilde kúni túngi saǵat 23.30-dan keıin Nur-Sultanda bolyp jatqan otshashýdyń vıdeolary áleýmettik jelide tarala bastaǵan kezde bılik áreketin synap jazǵan jeli qoldanýshylary kóbeıdi. Olardyń arasynda qarsylyǵyn óleń arqyly tanytqan aqyndar da bar. Qamshy tilshisi jeli qoldanýshylarynyń reaksııasyna sholý jasap, ondaǵan pikirdi nazaryńyzǵa usynyp otyr. 

"О́LIKTIŃ ÚSTINE BILEÝ DEGEN OSY"

Facebook jelisinde jazylǵan pikirlerden karantın kezinde oıyn-saýyq jasap, salıýt atqan bılik árketine degen qarsylyqty baıqaýǵa bolady. 

Esdáýlet Qyzyrbekuly, jýrnalıst: 

– О́liktiń ústine bıleý degen osy.

Janbolat Mamaı, oppozısııa belsendisi, saıasatker: 

– Nazarbaevtyń qurmetine atylǵan salıýt. Mynalardyń esi durys pa ózi? Adamdar qaı̆tys bolyp jatyr indetten. Dári-dármek joq. Aýrýhanada oryn joq. Indettiń taralý qarqyny boı̆ynsha álemde aldyńǵy oryndarǵa shyqtyq. Al bılik jaryqshaq atyp jatyr! Kisi ólimderine qýanyp jatsyńdar ma? Aspırın taýyp bere almaı̆ jatyp qaı̆daǵy salıýt?! Aı̆ bılik, ońbaı̆syńdar! Túgel aýystyrý kerek myna júı̆eni!

Erlan Tóleýtaı, ánshi, jeli belsendisi: 

– Adam tozaqqa da úırenedi, úsh kúnnen keıin bir-birine ot shashyp oınaıdy deıdi. Aýrýhanalarda tozaq ornaǵan. Morgterde óshiret. Astanada salıýt atyp jatyr...

Nurtaı Ernazar, jeli qoldanýshysy: 

–  Mynadaı aýyr sətte otshashý jasamaı-aq únsiz ǵana toılaıyq deýge eshkimniń batyly jetpegen-aý sirə! El aman bolsa toı kóp qoı, qoıa salyńdar deýge kókemniń de "qudireti" jetpepti. Bizdi qoıshy, úırengenbiz ǵoı, syrttaǵy jurt ne oılaıdy?.. Tragedııa ústindegi toı retinde tarıhta qalmasa bolǵany.

Qýanysh Edilhantegi, jeli belsendisi: 

– Mynadaı jaǵdaıda salıýt atyp toı toılaý – qaı turǵydan alyp qaraǵanda da tym ersi, aqylǵa syımaıtyn kórgensizdik.
 
Osydan eki-úsh kún buryn bolsa da, mysaly aýrýdyń taralýy jóninen álemde birinshi orynǵa shyqqanymyz týraly habar shyqpaı turyp toılansa da eshteńe emes, al sol habardy estip otyryp toı toılaý, onyń ústine karantın jaǵdaıynda toılaý – azǵyndyqtyń naǵyz shegi dep oılaımyn. "Vıshenka na torte" degenimiz osy – moraldyq turǵyda ábden azǵyndadyq.
 
 

Kúltegin Aspanuly, jeli qoldanýshysy:

– Elıta esinen tanǵansha toı toılatyp jatyr. Otshashýdyń janyp-óshken ár jarqylynan sapasyz medısınany áspettegen júıeniń kesirinen der kezinde qajetti járdem kórmeı, dertine daýa tappaı jan tapsyrǵan qazaqstandyqtyń rýhyn kórem. Jurttyń jylaǵysy keledi eńkildep...
 
Baqytjan Qosbarmaqov, jýrnalıst: 
 
Kúńkildeımiz, kijinemiz, azar bolsa, boqtaımyz, qarǵaımyz. Erteń báribir báz baıaǵy tirligimizge kirisemiz: qoıshy qoıyna, toıshy toıyna ketedi, saýdager bazaryna ketedi. Qaıtadan apteka adaqtap, dári izdeımiz, ólgen týysymyzdy, jaqyndarymyzdy jerleımiz. Jylaımyz, joqtaımyz, kúrsinemiz, kúńirenemiz. О́tinemiz, jalynamyz. Kúńkildeımiz, kijinemiz, bezbúırek ókimetti taǵy gúj-gúj sybap-boqtaımyz, taǵy júz-júz laǵnet jaýdyryp qarǵaımyz. Odan aryǵa barmaımyz. Erteńine báz baıaǵy tirlik, baıaǵy ómir. Mine, qazaqtyń tirligi, mine, qazaqtyń ómiri!
 
 
 
 
"OT PEN DERT AIQYNDAP BERGENDEI, BILIK PEN HALYQTYŃ ARASYN"
 
Eldegi epıdemıologııalyq jaǵdaıda qaramasatan, bas qalada oıyn-saýyq ótkizip, salıýt atqan bılik áreketi aqyndardy da beı jaı qaldyrmady.  Facebook jelisinde Eseı Jeńisuly, Juldyzaı Ysqaq, Nurqanat Qaırat syndy aqyndar qarsylyǵyn óleń arqyly jetkizdi. 
 
Juldyzaı Ysqaq, aqyn: 
 
"Otshashý...
Qaraly el...
Qara tún,
"O, netken úılesim, jarasym!"
Ot pen dert aıqyndap bergendeı,
Bılik pen halyqtyń arasyn..."
 
 
Nurqanat Qaırat, aıtysker aqyn: 
 
"Astanada toı toılap, ot shashýda, 
Sala almapty bir adam noqtasyn da. 
Qaryny men mansabyn oılaıtyndar, 
Qarapaıym qazaqty joqtasyn ba?!"
 
 
 
Eseı Jeńisuly, jýrnalıst, aqyn: 
 
"Eskertkishiń bar endi taza mystan,
Tutty, sirá, qyzǵanyp aza dushpan.
Kúlli álemniń ókpesi kúıip jatyr,
Seniń toıyń bitpedi-aý, Qazaqstan...
 
Bıligińde eshkim joq shala mıly,
Biraq sharýań qalmaı-aq barady ıgi.
Betperdesin ıekke túsire sap,
Betke ustaıdy top adam qaraly úıdi....."
 
 
Qazaqstanda jyl saıyn 6 shildede el astanasy men eldiń eks-prezıdenti Nursultan Nazarbaevtyń týǵan kúni birge toılanady. Bılik bıyl da koronavırýsqa baılanysty engizilgen karantınge qaramastan, jyldaǵy dástúrinen aınymady. Alaıda bıyl Astana kúni qurmetine josparlanǵan sharalar onlaın rejımde ótti.
 
Sońǵy resmı aqparatqa saı, elde koronavırýsqa shaldyqqandar sany 48 574 adamǵa jetip otyr. Osy ýaqytqa deıin olardyń 16118-i aýrýynan jazylyp shyqty. Al 264 adam indetten kóz jumdy. 

Qazaqstanda koronavırýs juqtyrǵandar alǵash ret naýryz aıynyń basynda anyqtala bastady. Artynsha elde eki aıǵa jýyq tótenshe jaǵdaı rejımi jarııalanyp, qalalar karantınge jabyldy. Mamyr aıynyń ortasynda bılik tótenshe jaǵdaı rejımin alyp, karantın shekteýlerin jeńildete bastaǵanda vırýs juqtyrǵandar sany kúrt ósti. Sońǵy aıda elde kúnine kemi 1000 adamnan vırýs anyqtalyp júr. 

Qazir eldegi dárihanalarda dári tapshy. Aýrýhanalarǵa naýqastar syımaı jatyr.

 

 

 

Qate tapsańyz, qajetti bólikti tańdap ctrl+enter basyńyz.

Banner

Pikir qaldyrý

pikir