Koronavırýstan qalaı qorǵaný kerek?

«Astana medısına ýnıversıteti» kommersııalyq emes aksıonerlik qoǵamynyń dosenti Roza Súleımenova koronavırýs júqtyrmas úshin ımmýnıtetti qalaı nyǵaıtýǵa bolatynyn aıtyp berdi, dep habarlaıdy QazAqparat.

– Eń bastysy – ımmýnıtetti álsiretpeı, durys tamaqtaný kerek. Aǵzanyń ımmýnıteti 30-40 paıyz aqýyzdan jáne 50 paıyz jemis-jıdek pen kókónisten turady. Sondyqtan jylqy, sıyr etinen, balyqtan qaınatylǵan sorpany ishken jón. Sonymen qatar, suıyqtyqty kóp ishken abzal. Kúnine 3-5 lıtrge deıin sý, kompot jáne mors ishýge bolady. S vıtamıni óte qajet aǵzaǵa, ol almada, lımonda, qaraqatta mol bolady6 – deıdi maman.

Dárigerdiń aıtýynsha, kóterińki kóńil-kúı aýyryp qalmaýǵa kóp septigin tıgizedi. Kúızeliske túspegen durys. Eshqashan baıbalam salmaı, ýaıymdamaı, barynsha sabyr saqtap, jaqsylyqtan úmit etý kerek, óıtkeni ımmýndyq júıe osyǵan tikeleı baılanysty.

– Keńsede jáne úıde jumys isteıtinder bólmeni jıi jeldetip, súrtip, tazalap otyrǵany jón. Maska kıip, gıgıenany saqtaýdy umytpańyz. Sonymen qatar, kópshilikti óz betińizshe emdelmeı, áýeli emhanadaǵy ýchaskelik dárigermen nemese jedel járdemge habarlasyp, sondaǵy mamandarmen aqyldasýǵa shaqyramyn. Basyńyz aýyryp, qurǵaq jótel, entigý paıda bolsa, dene qyzýy kóterilip, ıis sezýden aıyrylsańyz, álsizdik pen tersheńdik sezinseńiz, birden mamandarmen keńesip, em-dom alyńyz, – dep túıindedi sózin Roza Súleımenova.