Týǵan kúni qarsańynda Nazarbaevqa taǵy bir eskertkish qoıyldy

Qazaqstan astanasynda eldiń eks-prezıdenti Nursultan Nazarbaevqa arnalǵan monýment ashyldy. Onyń ashylýyna eldiń qazirgi prezıdenti Qasym-Jomart Toqaev onlaın rejımde qatysqan. Bul týraly Aqorda saıty habarlady.

Saıttyń jazýynsha, Nazarbaevqa arnalǵan eskertkish Ulttyq qorǵanys ýnıversıtetinde boı kótergen. Bul ýnıversıtet te Nazarbaevtyń atynda. 

Toqaev onlaın ótken ashylý saltanatynda Nazarbaevtyń qazirgi Qazaqstannyń negizin qalaǵanyn, eldiń strategııalyq damý jolyn aıqyndap, halyqty ortaq maqsatqa jumyldyrǵanyn aıtqan.

"Turaqtylyq pen tatýlyq, bereke men birlik – Elbasynyń sarabdal saıasatynyń nátıjesi. Kez kelgen memlekettiń tarıhynda óshpes iz qaldyrǵan biregeı tulǵalar bar. Olardyń sińirgen eńbegin baǵalaı bilý jáne jan-jaqty dáripteý – óskeleń urpaqtyń paryzy" dedi prezıdent.

Nursultan Nazarbaev – Qazaqstandy 30 jylǵa jýyq úzdiksiz bılegen prezıdent. Ol ótken jyly óz erkimen otstavkaǵa ketken. Biraq eldegi bıliktiń bir tarmaǵyn áli de ustap otyr. 

Qazaqstanda Nazarbaevqa arnalǵan monýment, eskertkish kóptegen qalada bar. Eldiń astanasy da byltyr burynǵy prezıdenttiń qurmetine Nur-Sultan dep ózgertilgen.