Psıholog: Árbir besinshi bala aptanyń jeti kúniniń birin áleýmettik jelige jumsaıdy

Áleýmettik jeliniń teris saldary retinde sarapshylar táýeldik pen ol jerdegi qarym-qatynasty jıi aıtyp júr.

Psıholog Sholpan Ákimova jelide ýaqytyn kóp ótkizetin jasóspirimderge kóp kóńil bólý qajet ekenin, óıtkeni olardyń jasynda psıhıkalary turaqty emes jáne ǵalamtorǵa táýeldik dep atalatyn psıhologııalyq aýrý paıda bolatynyn aıtady.

– Ǵalamtorǵa táýeldik – ártúrli keshenderdiń paıda bolýyna sebep bolýy múmkin psıhologııalyq aýytqý. Bala osyndaı aýytqýǵa tap bolmaý úshin áleýmettik jelilerdegi óz akkaýnttaryna qanshalyqty jıi kiretinin qadaǵalaýy qajet. Sondaı-aq ǵalamtordy paıdalaný ýaqytyn shekteý kerek. Eger jasóspirim buǵan agressıvti áreket etse, onda ártúrli sharalar qoldaný kerek. Bul aýrý mekteptegi jasóspirimderdiń úlgerimine, sondaı-aq olardyń dúnıetanymyna áser etedi. Statıstıkaǵa sáıkes, balalardyń 23 paıyzy áleýmettik jelilerde aptasyna 7 saǵattan 14 saǵatqa deıin, 57 paıyzy 14-21 saǵatqa deıin, 20 paıyzy 21 saǵattan artyq ýaqyt ótkizedi. Árbir besinshi bala aptanyń jeti kúniniń birin áleýmettik jelige jumsaıdy, – deıdi psıholog.

Psıhologtyń aıtýynsha, 28 jastan 45 jasqa deıingi jalǵyz basty adamdar áleýmettik jelilerge úlken úmit artatyn kórinedi.

– Olar ǵalamtor arqyly tanysý ońaı dep oılaıdy. Statıstıkaǵa sáıkes, álemdegi árbir besinshi otbasy áleýmettik jeli arqyly tanysqan. Biraq munyń keri jaǵy da bar. Árbir úshinshi ajyrasý áleýmettik jelilerge baılanysty oryn alady. Áleýmettik jelilerde tanysýdan keıin kózge shóp salý sany úsh ese ósti. Vırtýaldy álemdegi áıeldermen sóılese otyryp, erler olarǵa qamqorlyq jasaýdy umytyp qalýy múmkin. Vırtýaldy qarym-qatynas názik jandylarǵa da áser etedi, óıtkeni olar ashyq fotosýretter men jeke ómiri týraly málimetterdi kópshilik nazaryna sala otyryp, ózderiniń jumbaqtyǵyn joǵaltady. Bul da shańyraqtyń shaıqalýyna birden bir sebep bolýy ábden múmkin, – deıdi Sh.Ákimova.

«Media System» kompanııasynyń «Brand Analytics» servısi usynǵan málimet boıynsha, bıyl maýsym aıynda qazaqstandyqtar kóbi «VKontakte» jelisinde otyrǵan. Servısti bir aıda 1 309 669 adam qoldanǵan. Olar 16 629 521 habarlama jarııalaǵan. Reseılik jelini paıdalanatyndardyń 59 paıyzy er adamdar bolsa, 41 paıyzy – áıelder. Bul áleýmettik jelide kóbine 18 jasqa deıingi jastar otyrady eken.

Ekinshi orynda – Instagram jelisi. Ony Qazaqstanda 1 mıllıonnan astam adam qoldanady. Olardyń kóbi, ıaǵnı 71,9 paıyzy – áıelder, qalǵan 28,1 paıyzy – erler.

Úshinshi orynda – Facebook tur. Atalmysh jelini Qazaqstanda bir aıda 326 887 adam qoldansa, olardyń kóbi, ıaǵnı 58 paıyzy – áıelder, qalǵan 42 paıyzy – erler. Olar bir aı ishinde 9 673 614 habarlama jarııalaǵan. Negizgi aýdıtorııa, ıaǵnı Facebook jelisin qoldanatyndardyń 37 paıyzy – 35-44 jas aralyǵyndaǵy adamdar.

Twitter jelisinde 26 101 qazaqstandyq otyrsa, olardyń 41 paıyzy – áıel adamdar, qalǵan 59 paıyzy – er adamdar. 730 703 habarlama jarııalaǵan.