Koronavırýstan jazylyp shyqqan Nazarbaev halyqqa úndeý joldady

Qazaqstannyń eks-prezıdenti Nursultan Nazarbaev óziniń koronavırýstan jazylyp shyqqanyn aıtyp, halyqqa úndeý joldady. Birqatar BAQ-ta jarııalanǵan Nazarbaevtyń úndeýi ózi aýyryp jatqan kezde tilektes bolǵandarǵa alǵys aıtýymen bastalǵan. 

"Birqatar shet memleketter men úkimetter basshylarynyń, kórnekti saıasatkerler men qoǵam qaıratkerleriniń shynaıy janashyrlyǵyn tanytyp, maǵan moraldyq qoldaý kórsetkeni kóńilimdi tebirentti. Barshasy qaltqysyz nıettestigin jetkizip, sergektik tilep, tezirek saýyǵyp ketýime tilektestigin joldady, sol úshin bárine zor rızashylyǵymdy bildiremin" dep alǵys aıtqan Nazarbaev. 

Ol úndeýinde óziniń koronavırýstan qalaı jazalyp shyqqany týraly da aıtqan. 

"Dárigerlerdiń kúsh-jigeri jáne olardyń talaptaryn múltiksiz oryndaýdyń, sondaı-aq barshanyń qoldaýy men jyly sózderiniń arqasynda men syrqattan saýyǵyp shyqtym, qazir ózimdi jaqsy sezinemin, tolyqqandy jumysqa kiriskeli otyrmyn" deıdi Nazarbaev.

Eks-prezıdent ózi Qazaqstandy basqaryp turǵan kezde qurylǵan Ulttyq qordy "álemdik eki birdeı daǵdarysty jeńip shyǵýǵa septigin tıgizdi" deı kele qor qarajatynyń pandemııaǵa qarsy jumystarǵa da paıdasy tıip jatqanyn aıtqan.

"Bul bizge álemdik eki birdeı daǵdarysty jeńip shyǵýǵa septigin tıgizdi jáne sol qarajat qazir Úkimetke pandemııaǵa qarsy aýqymdy jumys pen turmysy tómenderge qoldaý kórsetý barysynda kómegin tıgizýde. Eger aldaǵy ýaqytta ony aqylmen, únemdep paıdalana bilsek, ózge syn-qaterlerdi de tıimdi eńsere alamyz. Qazaqstannyń basqa elder aldynda qaryzy eń tómen memlekettiń biri ekeni de bizdiń artyqshylyǵymyz" deıdi ol. 

Eks-prezıdent óz úndeýinde halyqty tirtip saqtaýǵa shaqyrady.

"Qajetti gıgıena talaptaryn oryndap, tezirek vaksına paıda bolaryna úmittene otyryp, aýrý juqtyrýdan barynsha uzaǵyraq ýaqyt saý bolýǵa tyrysqan jón. Tártip saqtap, óz densaýlyǵymyzdy, týǵan-týystar men jaqyndardyń amandyǵyn oılaýymyz qajet, dárigerlerge sený kerek" deıdi ol. 

Úndeýiniń sońynda Nazarbaev ádettegideı urandy sózder aıtqan.

"Halqymyz basqa túsken qıyndyqty óziniń qaırat-jigeri, uıymshyldyǵy, bolashaqqa degen umtylysy arqyly búkil halyqaralyq qoǵamdastyqpen birge laıyqty túrde eńserip, aman-esen shyǵaryna senimdimin. Biz taǵy da jeńimpaz bolamyz. Elimizdiń jaqsy kúnderi alda. Biz birgemiz! Biz jeńemiz! Bizdiń uranymyz osy. Barlyq otandastarymyzǵa myqty densaýlyq pen ıgilik, elimizge baq-bereke tileımin" deıdi eks-prezıdent. 

Qazaqstandy 30 jylǵa jýyq úzdiksiz bılep, byltyr óz erkimen prezıdenttikten ketken Nursultan Nazarbaevtyń koronavırýs juqtyrǵany 18 maýsymda habarlanǵan. Týra 14 kún ótken soń, 2 shilde eks-prezıdenttiń indetten aıyqqany belgili boldy.