Kúıeýinen taıaq jep, artynan koronavırýsqa shaldyqqan kelinshektiń janaıqaıy

Qamshy redaksııasyna "kúıeýimnen zábir kórip, ádildikke jete almaı júrmin" degen Gúlmıra Baltabaeva atty kelinshek habarlasty. Kelinshek kúıeýiniń áldeneshe ret qol kótergenin dáleldeıtin aıǵaqtary jetkilikti ekenine qaramastan quzyrly oryndar tıisti áreket jasamaı otyrǵanyna kúıinedi.

Gúlmıra Baltabaeva – eki balanyń anasy. Eki ret nekede bolǵan. Eki perzenti de alǵashqy nekesinen. Kelinshek, alǵashqy kúıeýiniń de qol kótergenin aıtty.

– Birinshi kúıeýimmen 9 jyldaı bir shańyraq astynda ómir súrdim.  Bastapqyda bári jaqsy bolyp, tatý-tátti turdyq. Keıingi ýaqytta enemiz ortamyzǵa túsip, aramyz sýı bastady. Onyń ústine kúıeýimniń maǵan degen qarym-qatynasy ózgerip, úıge qonbaıtyn bolyp júrdi. Odan qaldy uryp-soǵatyn. Birde shydamaı balalarymdy alyp, ata-anama ketip qaldym. Sol ýaqytta ol basqa áıelge úılenip alypty. Ony estip ajyrasyp, keıin barmadym, – degen kelinshek ekinshi qarym-qatynasyndaǵy jarasymdy sátter alǵashqydan da qysqa boldy deıdi.

– Almaty qalasyndaǵy áskerı departamentte jumys istep, qyzym ekeýmiz Aqsaı-5-tegi otbasylyq jataqhanada turdyq. Al ulym ata-ájesiniń qolynda boldy. Birde shaǵyn kafede bir er adammen tanystym. Bir-eki aptadaı sóılesip júrdik. Artynan birge azamattyq nekede turyp júrdik. Bastapqyda qyzyma jyly qarap, bizge qamqor bolyp júrdi. О́kinishke qaraı, aramyzdaǵy jaqsy qarym-qatynas bir aıǵa ǵana sozyldy. Uzamaı ol da ura bastady. Birde qurbymnyń týǵan kúninen shyǵyp, jataqhanaǵa kele jatsam, bas salyp, esik aldynda sabaı bastady. Sol kezde onyń mundaı ádetin alǵash ret baıqadym.  Áıteýir, kórshi-qolań áreń degende ajyratyp aldy. Sol kúni-aq polısııaǵa aryzdanǵanmyn. Biraq ertesine saýyqqan soń bar kinásin moıyndap, "endi ishimdikti tatyp almaımyn, urmaımyn" dep ýáde berdi. Aıtqan ýádesine sengendikten keshirdim, – deıdi Gúlmıra Baltabaeva.

ALAIDA MUNYSYNYŃ QATE BOLǴANYN ARTYNAN TÚSINGEN

– Kóp ótpeı kúıeýim ashýyna tısem, sózim, ne qylyqtarym unamaı qalsa, birden taıaqtaýǵa qaıta kóshti. Júrgen jerimiz aıqaı men urys bolǵandyqtan, jataqhanada tura almadym. Páter jaldap bólek turýǵa týra keldi. Tatýlasqan kezimizde jigitim kómektesip, qaraılasyp turǵan kezder de boldy. Biraq jıi janjaldasatynbyz. Men tikeleı qujatpen jumys jasaǵandyqtan, kúndelikti túrli hattar kelip, er adamdar jumys babymen jıi habarlasatyn. Uıaly telefondarymyzdy alyp, qaıtarda ǵana beretin. Ol muny jaqsy bilgenimen únemi qyzǵanatyn, senimsizdik tanytatyn. Taıaq jegennen jumysqa ústi-basym kókpeńbek bolyp barǵan kezderim de boldy. Birde tańnan keshki altyǵa deıin úıde qamap, telefonymdy bermeı, shashymnan súırep, kúni boıy uryp-soqty. Tipti betimniń saý jeri qalǵan joq shyǵar. Qashyp ketpek bolǵan áreketterim sátsiz aıaqtalyp jatty. Osy qysta  kesh bata úıden qashyp shyǵyp, aýyl mańyndaǵy bóten úıde jan saýǵaladym. Sol jerden jedel járdem men polısııa shaqyryp, anama habarlastym. Ertesine esimdi jısam, aýrýhanadamyn, anam halimdi kórip, jylap otyr. Sodan 15 kúndeı aýrýhanada jatyp, jańa jyl qarsańynda jazylyp, óz-ózime keldim. Isti bulaı qaldyrýǵa bolmaıtynyn túsinip, sotqa aryzdandym, – deıdi kelinshek.

GÚLMIRA BALTABAEVA SOT TYM JEŃIL JAZA TAǴAIYNDADY DEP SANAIDY.

– Almaty qalasy Alataý aýdanynyń soty saraptama nátıjesin "aýyrlyq dárejesi jeńil" dep tanypty. Al, mende alǵan jaraqatym aýyr bolǵanyn dáleldeıtindeı foto túrindegi aıǵaq jetedi. Osy naýryzda sot boldy. Sonda maǵan jasalǵan isterin tizip aıttym. Sot barlyq sózimdi estise de eshkim meni tyńdaǵan joq. Prokýror isti qarap, jaza retinde ony 15 táýlikke qamaýǵa nemese 3 aıǵa maǵan jaqyndaýǵa tyıym salýǵa bolatynyn aıtty. 15 kún túrmege otyryp shyqsa ol meniń mazamdy qaıtadan alatynyn bildim de amalsyzdan jazanyń ekinshi túrin tańdadym.  Ol soǵan qaramastan sáýir aıynda meni qaıtadan taýyp alyp, qoqan-loqqy kórsetip, terezemdi syndyrdy. Úıge kelgen polıseı esik aldynda súıenip turyp meni tyńdady da, synǵan esik-terezeni tym bolmasa sýretke de túsirmeı ketip qaldy. Kelesi kúni polısııa bólimshesine barǵanymda "karantın" dep qabyldamaı qoıdy. Keıin onyń 10 kúnge qamaýǵa alynǵanyn bildim. Qazir kúıeýimniń qaıda ekenin bilmeımin. Kúnim qorqynyshpen ótip jatyr. Únemi syrtymnan ańdyp júrgendeı bolady da turady. Kóshede kezigip qalsaq, qashyp qutyla almaıtynymdy bilem. Ol tipti ashýlyqpen abaısyzda adamdy jazym etip qoıýyda ǵajap emes, – deıdi Gúlmıra Baltabaeva.

KELINShEK QAS QYLǴANDAI ENDI KORONAVIRÝSPEN AÝYRYP QALǴANYN AITYP, JAǴDAIYNYŃ NE BOLARYN BILMEI DAL.

– О́tken beısenbide býyndarym, aıaqtarym aýyryp bastady. Qatty qınalyp jatsam, bankten nesıeńdi tóle dep kúnde habarlasady. О́zim juma kúni sońǵy ret jumysqa barǵanmyn. Jumystan kelgen soń aıaq astynan ystyǵym kóterildi. Keshki 19:00-de shaqyrǵan jedel-járdemim túngi 23:30-de bir-aq keldi. Úsh saǵat kútken dárigerlerim dári berip, esh shara qoldanbady. Tek oryn bosaǵanda aýrýhanaǵa jatqyzamyz dedi. Aýyryp 1 apta úıde jattym. 2 shildede jaǵdaıym nasharlap aýrýhanaǵa tústim. Qazir ózdigimnen dem ala almaımyn. Koronavırýsqa tapsyrǵan analız nátıjesi oń shyqty. Ári qaraı jaǵdaıym qalaı bolaryn bilmeımin, – deıdi kelinshek.