Almaty oblysynda eriktiler jylynyń saltanatty ashylýy ótti

Sharanyń shymyldyǵy  qazaq eliniń tarıhynan syr shertetin jáne jalyndy jastardyń qarym-qabiletin tanytatyn beıneúzikter kórsetiliminen jáne zamanaýı bımen ashyldy.

Ashylý saltanatynda  QR Parlamenti Senatynyń depýtaty Nurlan Qylyshbaev, QR Parlamenti Májilisiniń depýtattary Zaǵıpa Balıeva, Omarhan О́ksibaev, Ersultan Bekturǵanov, Marat Bopazovtar sóz alyp, saltanatty sharanyń ashylýyn quttyqtap, qazaq eliniń jastaryna degen senimderin bildirdi.

– Memleket basshysy Qasym-Jomart Toqaev óziniń Qazaqstan halqyna Joldaýynda azamattyq qoǵamdy nyǵaıtýda eriktilerdiń orny erekshe ekenin aıtty.Búgin, mine, jer jannaty Jetisýda kóńilden shyqqan istiń basynda jınalyp otyrmyz. Men árqashanda eriktilerdiń jumysyna rızashylyǵymdy bildirip kelemin. Búginde oblysymyzda 1043 erikti, 19 eriktiler uıymy bar. Men solardyń bárine oblys basshysy retinde 2 mıllıonnan astam jergilikti halyqtyń atynan alǵysymdy aıtqym keledi, – degen oblys ákimi Amandyq Ǵabbasuly eriktiler jylynyń ashylýymen kópshilikti quttyqtap, aldaǵy ýaqytta olarmen ıgilikti isti ortaqtasa atqaratyndyǵyn aıryqsha atap ótti.

Sonymen qatar óńir basshysy ótken jyldyń sońynda Almaty qalasy mańynda bolǵan ushaq apatyna da eriktiler eń aldymen jetip, óz qoldarynan kelgenshe kómegin aıamaǵandyǵyn, sol sekildi eldiń qýanyshyna da ortaqtasyp kele jatqan eriktiler jeterlik ekenin tilge tıek etti.

«Ted-talks» formatynda ótken jıynǵa   paralımpıadalyq oıyndardyń qatysýshysy, «Qazaqstannyń 100 jańa esimi» jobasynyń jeńimpazy Serik Esmatov, aıtysker aqyn, telejúrgizýshi Jandarbek Bulǵaqov, «Eriktiler lıgasy» Qaıyrymdylyq qory tóraıymynyń orynbasary Kamıla Zeınalova, oblys ákiminiń «Kóshbasshy – 2018» Jastar syılyǵynyń «Úzdik erikti» atalymynyń jeńimpazy Erjan Dáýletbaev, «Qazaqstannyń 100 jańa esimi» jobasynyń jeńimpazy, aqyn, «Jetisý» gazetiniń menshikti tilshisi Maqpal Mysa, oblys ákiminiń «Kóshbasshy – 2019» Jastar syılyǵynyń «Úzdik erikti» atalymynyń jeńimpazy Jazel Dakýbaevalar arnaıy shaqyrylǵan.

Saltanatty sharanyń sońy estrada juldyzdarynyń qatysýymen konserttik baǵdarlamaǵa ulasty.