• USD 412.55
  • EUR 465.73
  • RUB 5.79
  • CNY 58.91

26 Maýsym, 2020 NEWS

Amerıkaǵa jete almaǵan stýdentter narazylyqqa shyqty

qamshy.kz

Áleýmettik jelide birneshe adam Work and travel baǵdarlamasymen "AQSh-qa aparamyz" dep sendirgen Nur-Sultan qalasyndaǵy Corvette Center JShS-dan aqshalaryn qaıtara almaı júrgenin jazýda. Qamshy tilshisi "kompanııa qarjymyzdyń qomaqty bóligin qaıtarǵysy kelmeı otyr" degen eki jábirlenýshimen sóılesti.

Nur-sultandyq Maıa Qýanyshova men Aıjan Ábjanqyzy kompanııamen kelisim-shartqa otyrǵan. Ol boıynsha kompanııa qyzdardy AQSh-qa aparyp, sol jaqtan 3 aıǵa jumys taýyp berýge mindettelgen. Ortalyq kórsetiletin qyzmet úshin aqshany aldyn ala alǵan. Alaıda túrli syltaý aıtyp vıza ýaqytyn keshiktirgen. Artynsha pandemııanyń kedergi bolyp jatqanyn habarlap, 22 maýsymda baǵdarlamanyń múlde bolmaıtynyn, aqshalarynyń basym bóliginiń qaıtpaıtynyn málimdegen. Sońǵy birneshe kúnnen beri kompanııa ókilderimen baılanysý múmkin bolmaı tur.

Maıa Qýanyshova qarajatyn qaıtarý úshin "aqyryna deıin baram" dep otyr.

– Alǵashqyda ortalyqqa vızaǵa dep 150 myń teńge tóledim. Keıinnen taǵy 1575 dollar (632 378 teńge) tóleýimdi surady. Tóledim. Jalpy atalǵan ortalyqqa 800 myń teńge kóleminde aqsha berdim. Kompanııamen jasalǵan kelisimshart boıynsha biz AQSh-ta 25 mamyrdan qyrkúıek aıy aralyǵynda bolýymyz kerek edi. Alaıda ortalyq basshylary vıza daıyn bolmaı jatqanyn aıtyp, kútýimdi surady. Pandemııaǵa baılanysty Amerıkaǵa saparymyz taǵy keıinge qaldy. Endi mine, 22 maýsymda baǵdarlamanyń múlde bolmaıtynyn, bergen qarajatymyzdyń 200 myń teńgesi ǵana qaıtatynyn aıtyp otyr. Osy baǵdarlamany júzege asyrýmen aınalysatyn basqa agenttikter stýdentterge aqshalaryn ədiletti túrde qaıtaryp jatyr. Al Corvette Center pandemııany bizdiń esebimizden óz paıdasyna sheshkisi keledi. Stýdentter "Work and travel" baǵdarlamasyn saıahat qana emes, jaqsy tabys kózi dep biledi. Sondyqtan Amerıkaǵa barý úshin jumys istep, nesıe alyp qarajat jınaıdy. Shyqqan shyǵyndy sol jaqta aqtap alamyz dep úmittenedi. Endi olarǵa armanyna jetpek túgili, bergen qarjysyn qaıtarý muń bolyp tur.

Qolymda kompanııamen jasasqan kelisimshart, qujattarym tolyq bar. Zańgerler zań bizdiń jaqta dep otyr. Men muny osylaı qaldyryp qoımaımyn. Sotqa deıin barsaq ta ədildikke jetkimiz keledi, – dedi Maıa Qýanyshova Qamshy tilshisine.

Aqshasyn qaıtara almaı júrgenderdiń biri Aıjan Ábjanqyzy "mekeme 600 myń teńgege jýyq aqshany ustap qalý arqyly, óz paıdasyn oılap otyr" deıdi.

– Men 2019 jyldyń 26 tamyzynda agenttikpen kelisimshartqa qol qoıdym. AQSh-ta jumys jasaý úshin 5 etapty tólem jasaý qajet. Ár etapta qarajat salyp otyrdyq. Pandemııa bolmaǵanda osy etaptardan keıin Amerıkaǵa ketýimiz qajet edi. Alaıda naýryzda karantın engizilip, saparymyz keıinge shegerildi. Biz qujattarymyzdy keri almaı, shekaranyń ashylýyn kúttik. Eger biz baǵdarlamaǵa qatysýdan óz erkimizben bas tartsaq, kompanııa 785 dollarǵa deıin ustap qalatynyn málimdedi. Biraq onyń bizge tıimsiz ekenin aıtyp, sońyna deıin kútýge kóndirdi. Osylaısha keshege deıin kúttik. 22 maýsymda baǵdarlamanyń bolmaıtynyn habarlady. Sózderinshe, Tramp eshqandaı vızaǵa ruqsat bermeı jatyr eken. Jeke ózim kompanııaǵa 800 myń teńgege jýyq aqsha berdim. Endi agenttik sol "800 myńnyń 200 000 myń teńgesin ǵana qaıtaramyz" deıdi. Osylaısha olar ár stýdentten 600 myń teńgeden ustap qalmaqshy. Osy qyzmetti usynatyn basqa agenttikter salynǵan aqshany ádil qaıtaryp jatyr. Al bizge "200 myń teńgeni qaıtaryp ala alasyzdar" dep búgin ǵana sheshim kórsetilgen hat jiberip otyr. Biz buǵan kelispeımiz, – deıdi Aıjan Ábjanqyzy.

Qamshy tilshisi Corvette Center kompanııasynyń áleýmettik jelilerdegi paraqshasynda jazylǵan telefondarǵa habarlasqanynda, tutqany eshkim kótermedi.

 

Qate tapsańyz, qajetti bólikti tańdap ctrl+enter basyńyz.

Banner

Pikir qaldyrý

pikir