• USD 412.55
  • EUR 465.73
  • RUB 5.79
  • CNY 58.91

23 Maýsym, 2020 Suhbat

Karantınde 500 myń teńge tabys tapqan 19 jastaǵy bloger

qamshy.kz

Laýra Lesbek – bloger, SMM maman. Oqyrmandary ony "aqyldy bloger" atap ketken. Laýra 18 jasynan SMM salasynda bilim alǵan. Ol óz jumysyn 2 bıznes jáne 1 jeke paraqsha júrgizýden bastaǵan. Instagram paraqshasynda 400 oqyrmany bolsa da 200 myń teńge tabys tapqan. 19 jastaǵy Laýra Lesbek Qamshy tilshisine áleýmettik jeli arqyly qalaı tabys tapqanyn jáne bloger bolýda alǵashqy qadamdy neden bastaý kerektigin aıtty.

− SMM salasyn tańdaýyńyzǵa ne túrtki boldy?

1-kýrsty bitirgennen keıin jumys istep, óz-ózimdi qamtamasyz etemin degen nıetpen Almatyǵa keldim. О́zim sekildi damý jolynda júrgen jastardyń isinen shabyt aldym. Oqýshy kezimde jýrnalıst bolǵym kelgen. Aqparatty tez qabyldap, praktıkada qoldanatynmyn. Osy qabiletim maǵan kóp kómektesti. Jýrnalıstıkaǵa tikeleı túspegenimmen, ózimdi áleýmettik jelide synap júrmin. Bul sala maǵan qyzyq. Sondyqtan SMM boıynsha arnaıy kýrs oqydym.

− Búginde naqty nemen aınalysasyz?

Kýrsty bitirgennen keıin birden iske kiristim. Alǵash dombyra mektebiniń, keıin hosteldiń jáne jeke tulǵanyń Instagram paraqshalaryn júrgizdim. Júre kele, teorııadan da mańyzdy kóp dúnıeni túsindim, qatelerimdi jóndedim. Búginde alǵan bilimim men tájirıbemdi jınaqtap, "Bloger bolǵym keledi" kýrsyn ótkizip júrmin. Osy ýaqytqa deıin barlyǵy 150-den astam adam oqyp shyqty. Onyń 10-nan astamy áleýmettik jelidegi paraqshalaryn belsendi túrde damytyp, óz jobalaryn jasap júr. Qatysýshylardan kómegimdi aıamaımyn, olardyń jetistigimen maqtanamyn. Kýrsymnan bólek, "Jına-like" atty onlaın tulǵalyq damý ortasyn da qurdym.

Búginde SMM-di, bloger bolýdy úıretetinder kóp. Árkimniń dárejesi, deńgeıi, aqparatty bere alatyn óz joly bar. Men ózime qarsylas retinde eshkimdi kórmeımin. О́ıtkeni bul jolymdy eshkim qaıtalamaıdy. О́nimimdi, aqparatymdy urlap berýi múmkin. Alaıda dál men sekildi usyna almaıdy.

Sondaı-aq "úıde otyryp aqsha tabýdy úıretemin" dep ýáde bermeımin. Bul – marketologtyń álsiz ádisi. О́zimdi saýatty marketolog retinde usynamyn. Adamnyń úıde otyryp aqsha tapqanynan góri frılanser bolyp, turǵan jerine qaramastan tabys tapqanyn qalaımyn. Basty ıdeıa – osy.

Siz qaı blogerdi úlgi tutasyz jáne kimderdi oqısyz?

− "Ustazdarym" dep reseılik blogerlerdi aıtamyn. О́ıtkeni olar áli Qazaqstanǵa jetpegen jańalyqty jaryqqa shyǵarady. Ár jobasynda sannan góri sapany, qundylyqty joǵary qoıady. Bul nárse Qazaqstanǵa, qazaqsha aýdıtorııaǵa áli jete qoımady. Blogtaǵy jańalyqty elge alǵash bolyp biz ákelemiz. Sol sebepti kórshiles eldiń blogerlerinen úırenerim óte kóp. Sondaı-aq maǵan rýhanı paıda ákeletin qazaqstandyq birneshe bloger bar. Marǵulan Seısembaı aǵamyz jáne Ulyqbek Sháripov, Beıbit Álibekov syndy bıznes blogerler unaıdy. Al jas býynnan oqyrman sany az bolsa da súısinip oqıtyn bloger bar.

− Aılyq tabysyńyz qansha?

– Kóp aqsha tabý úshin kúni-túni jumys isteýdiń keregi joq dep únemi aıtamyn. Tek baspen áreket etý qajet. Bul shynymen de solaı. Degenmen árkimniń qıyndyq shkalasy ártúrli. Bireý moraldy túrde, bireý fızıkalyq túrde qınalýy múmkin. Jalpy qandaı aqsha tapsań, ol seniń álemge berip jatqan paıdańnyń nátıjesi. Bul tusta meniń aıtatynym, qaı istiń de qýanyshy men qıyndyǵy qatar júretinin umytpaǵan jón. Adam ishki máselesin rettep, túpki maqsat pen nátıjeni túsinse, materıaldyq turǵyda jetistikke jete alady.

Meniń qazirgi aınalysyp júrgenim – rahat sezimin syılaıtyn jumys. Ony endi túsinip jatyrmyn. Sondyqtan bolar, asa sharshamaımyn. Hobbıiń seni baqytty etetin bızneske aınalady eken. Karantınde 1 aıdyń ózinde 500 000 teńgeden asa tabys taptym. Men óz jolymdy tapqanyma qýanamyn.

− Paraqshany júrgizýde nege mán berý kerek? Neden bastaǵan jón?

− Men óz blogymdy qalaı qurdym? Eń aldymen, ózim kimdi kórgim keldi, soǵan mán berdim. Nege? Sebebi telefonnyń ar jaǵynan bolsa da bloger isin qandaı nıetpen jasap jatqany baıqalyp turady.

Meniń oqyrmandarym óte belsendi. Maǵan fıdbeg (keri baılanys) alý, ózimniń kómektesip jatqanymdy túsiný – alǵa jyljýǵa áser etedi. Oqyrmannyń pikiri men lúpiline táýeldi bolyp qalasyń dep aıtyp jatady. Alaıda qazirgi kezde blogerdiń aýdıtorııasymen qarym-qatynasy qandaı bolsa, paraqshanyń belsendiligi de sondaı. Pikir jazyp, lúpil baspaıtyn jannyń ózi jekeme alǵysyn jazady. Bul – meniń eńbegimniń jaıdan-jaı emesiniń dáleli.

Kez kelgen adam bloger bola ala ma?

– Kóbi 100 myń ne 1 mln oqyrmany bar jandy ǵana bloger dep sanaıdy. Men úshin bloger – eń birinshi postyn jazyp bastaǵan adam. О́z basym blogerlerdi eshqashan Instagram-daǵy ataǵyna, oqyrman sanyna qarap bólmeımin. Kimde-kim álemmen óz qalaýyn bólise alsa, sol blog júrgizedi. Eshqandaı shekteý joq. Shekteý – sizdiń oıyńyzda.

Blog – adamnyń jan rahaty men júrek qalaýy úshin jasalatyn nárse. Muny kóp adam túsinse eken deımin. 

SMM salasyna qyzyǵýshylyq tanytyp, bloger bolǵysy kelip júrgenderge ne aıtasyz?

– Blogty jańa bastap jatqan blogerlerge aıtarym: árkimniń óz joly bar ekenin túsinińizder. Bir baǵytta birneshe adam bolǵanmen, árkimniń ómirdegi oqıǵasy, qabileti men talanty bólek. Bastapqyda elikteýiń nemese kóshirýiń múmkin. Biraq túpki maqsatyń, ıdeıa ózińdiki bolmasa, jasap jatqan isiń saǵan emosııalyq kúızelis alyp keledi. Shabytyń sarqylady. Sol sebepti bloger ózin adam retinde tanyǵanyn qalaımyn.

– Suhbatyńyzǵa rahmet!

Suhbattasqan Qundyzaı Ámirbekqyzy

 

 

 

 

Qate tapsańyz, qajetti bólikti tańdap ctrl+enter basyńyz.

Banner

Pikir qaldyrý

pikir