Sımptomsyz koronavırýs boıynsha PTR testi qandaı jaǵdaıda tapsyrǵan durys?

Densaýlyq saqtaý mınıstriniń mindetin atqarýshy Lázzat Aqtaeva halyqty sebepsiz PTR-testten ótpeýge shaqyrdy. Bul týraly ol ortalyq kommýnıkasııalar qyzmetinde ótken baspasóz máslıhatynda aıtty. 

"Júrgizilip jatqan testterdiń sany boıynsha málimetti keltirsek: 100 myń adamǵa eseptegende Qazaqstan táýligine 7 myń adamdy testten ótkizedi. Basqa eldermen salystyryp kórelik: 100 myń adamǵa eseptegende Avstrııa men Kanadada kúnine 6 myń adam, AQSh-ta 8 myń adamdy ótkizedi. Bul tizimde Qazaqstan 34-shi orynda tur" dedi Aqtaeva.

Ol azamattarǵa test tek klınıkalyq jáne epıdemıologııalyq kórsetkish boıynsha júrgizilýi kerektigin eske saldy.

"Testileýden medısınalyq uıymdardaǵy ınfeksııalyq jáne provızorlyq stasıonarlarǵa jatqyzylǵan, JRVI, pnevmonııa belgileri bar nemese KVI juqtyrǵan, medısınalyq baqylaýdaǵy azamattar ótedi. Epıdemıologııalyq kórsetkishter boıynsha naýqastarmen jaqyn qarym-qatynasta bolǵan azamattar, stasıonarǵa josparly nemese shuǵyl túsken pasıentter, medısınalyq-áleýmettik mekemelerge túsken azamattar testten ótedi. Sonymen qatar test aldyn alý sharasy úshin de ótkiziledi. Ol sanat boıynsha ótetinder: Qazaqstanǵa shetelden keletin azamattar, juqtyrý qaýpi joǵary medısına qyzmetkerleri (aıyna bir ret) men áskerge shaqyrylýshylar" dedi ol.

Buǵan bólek, densaýlyq saqtaý mınıstriniń mindetin atqarýshy medısınalyq kórsetkish boıynsha testten ótýdiń mańyzdylyǵyna toqtaldy.

"Test kórsetkishi joq azamattarǵa testten ótýdiń qajeti joq. Iаǵnı ne klınıkalyq, ne epıdemıologııalyq kórsetkishi joq azamattarǵa testten ótip qajet emes. Halyqtan tek medısınalyq kórsetkish boıynsha testten ótýdi ótinemiz. Adamdardyń testten ótýi kerektigin klınıkalyq nemese epıdemıologııalyq kórsetkish rastalǵan jaǵdaıda dáriger nemese epıdemıolog sheshedi. Men buryn koronavırýs ınfeksııasy anyqtalǵan naýqastardyń ishinde 24 paıyzynyń klınıkalyq kórsetkishi baryn atap ótken edim. Sol sebepti klınıkalyq kórsetkishi bar adamdarǵa basymdyq berilýi tıis. Sebebi koronavırýsty ýaqtyly anyqtaý – oıly em-domnyń kepili. Iаǵnı eger medısınalyq kórsetkishsiz qaralatyn bolsańyz, bul jaǵdaı zerthanalarǵa júktemeni údetip, tıisinshe test nátıjesin alý ýaqyty da sozylyp ketedi" dedi Aqtaeva.