• USD 468.56

  • EUR 497.56

  • RUB 7.3

  • CNY 67.18

29 Naýryz, 15:00:27
Almaty
+35°

Almaty ákimi Baqytjan Saǵyntaev Medısına qyzmetkeri kúnimen quttyqtaý úshin qalanyń medısına qaýymdastyǵymen onlaın-kezdesý ótkizdi.

Qala ákimi dárigerlerge jáne megapolıstiń barlyq medısına qyzmetkerlerine alǵys sózderin jetkizdi.

– Gıppokrat antyna adal aq halatty abzal jandar, Sizder ýaqyt synyna tótep bere bildińizder. Koronavırýspen kúreste sizderdiń janqııarlyq eńbekterińiz úshin barsha almatylyqtardyń atynan alǵysymdy bildiremin. Adam saýlyǵynyń qorǵany bolyp júrgen bul mamandyq ıeleriniń bedeline baǵa jetpeıdi, – dep atap ótti Baqytjan Saǵyntaev.

Qala ákimi Almatynyń únemi damyǵan medısına ortalyǵy bolǵandyǵyn basa kórsetti. Munda ǵylymı-zertteý ınstıtýttary jáne ortalyqtar, medısınalyq bilim beretin uıymdar, qalalyq, respýblıkalyq, vedomstvalyq, jeke klınıkalar shoǵyrlanǵan, qalada 30 myńnan astam medısına qyzmetkerleri eńbek etedi.

Jyl saıyn kásibı mereke qarsańynda kásibı baıqaýlar ótkiziledi. Bıyl mamandyqtyń úzdigin anyqtaıtyn bul baıqaý 13 nomınasııa boıynsha ótti. Atap aıtqanda, úzdik dáriger jáne medbıke, úzdik ınfeksıonıst, emhana men jedel járdemniń úzdik dárigeri, sondaı-aq úzdik júrgizýshi.

– Bul baıqaý Sizderdiń árqaısyńyzdyń eńbekterińizdiń barynsha mańyzdy ekenin kórsetedi. Barlyq jeńimpazdardy quttyqtaımyn, – dep atap ótken B. Saǵyntaev koronavırýspen kúreste jankeshtilik tanytyp júrgen eki myńnan astam dárigerdiń eren eńbekterin erekshe baǵalady.

Qalaǵa sińirgen zor eńbekteri úshin bes medısına qyzmetkeri «Eńbegi úshin» tósbelgisimen marapattaldy. Birqatar medısına qyzmetkerleri qala ákiminiń alǵys hattaryn ıelendi.

– Pandemııa bizdi kóp nársege úıretti. Ortaq kúsh-jigerimizben biz bul qıyndyqty da abyroımen eńseremiz, almatylyqtardyń densaýlyǵyn saqtaý men nyǵaıtý jolynda bárimiz birigip, aıanbaı eńbek etemiz, men buǵan senimdimin, – dep atap ótti Almaty ákimi B. Saǵyntaev.

Qala ákiminiń osy qyzmetke taǵaıyndalǵan kúnnen bastap densaýlyq saqtaý salasyn damytýǵa erekshe nazar aýdaryp kele jatqany burynnan belgili. Onyń tikeleı tapsyrmasy boıynsha qalanyń barlyq medısına mekemelerine materıaldyq-tehnıkalyq jaǵynan jabdyqtalýyna qatysty aýdıt júrgizildi. Jergilikti jáne respýblıkalyq bıýdjet arqyly qarjylandyrý boıynsha medısına mekemelerin jabdyqtaýdyń úsh jyldyq jospary jasaldy. Osynyń arqasynda Almatynyń medısına mekemeleriniń jabdyqtalý deńgeıin 90%-ǵa jetkizý josparlanǵan.

Aıta keterligi, qalaǵa qosylǵan aýdandarda «qadamdyq qoljetimdilik» qaǵıdasy boıynsha alǵashqy medısınalyq kómek kórsetetin mekemeler iske qosyldy. Mysaly, alǵashqy medısınalyq kómek kórsetý uıymdarynda jalpy praktıka dárigerleriniń 171 qosymsha ýchaskesi ashyldy. Jalpy qala boıynsha jalpy praktıkanyń 931 ýchaskesi uıymdastyryldy.

Bulardan ózge, 2019 jyldyń 10 maýsymynan bastap 10 dárigerlik ambýlatorııa ashyldy, Joǵary medısınalyq kolledj ben №30 qalalyq emhana kúrdeli jóndeýden ótti.

2020 jyldyń 1 qańtarynan bastap MÁMS júıesinde medısınalyq saýyqtyrý kólemi 7,4 ese ósti. Almaty qalasy boıynsha stasıonarlyq jáne stasıonardy almastyrý nysandaryn qarjylandyrý 4 esege, al klınıkalyq-dıagnostıkalyq qyzmetti qarjylandyrý da 4 esege artty.

2019 jyldyń maýsymy 2020 jyldyń mamyr aıy aralyǵynda densaýlyq saqtaýdyń 5 nysany iske qosyldy, onyń ishinde jedel járdemniń 2 qosalqy stansııasy jáne psıhıkalyq saýyqtyrý Ortalyǵynyń qalalyq korpýsy bar.

"Qamshy" silteıdi

Qate tapsańyz, qajetti bólikti tańdap ctrl+enter basyńyz.

Pikir qaldyrý

pikir