19 Maýsym, 2020 NEWS
UQK resmı saıty
Ulttyq qaýipsizdik komıtetiniń burynǵy basshysy Nartaı Dútbaev 2017 jyly memlekettik qupııany jarııalaǵany jáne qyzmet babyn asyra paıdalanǵany úshin 7,5 jylǵa sottaldy. Keıin onyń jazasyn 12 jylǵa deıin uzartty, odan soń qaıta qysqartty, aqyry ol merziminen buryn bostandyqqa shyqty dep jazady sputniknews.kz saıty.
Bul aqparatty Shyǵys Qazaqstan oblystyq sotynyń sýdıasy Eldos Jumaqsanov rastady.
"Keshe, 18 maýsymda bosatyldy. Sottyń úkimi – merziminen buryn shartty túrde bosatý. Sot aktisine shaǵym túsken joq, eshkim qarsylyq bildirmedi. Úkim zańdy kúshine endi" dedi Jumaqsanov.
Onyń aıtýynsha, Dútbaevqa berilgen jazanyń merzimi qaıta esepteldi. 2020 jyly 11 qańtarda Qylmystyq kodekske engizilgen ózgerister men túzetýler kúshine engen bolatyn. Oǵan sáıkes, orta deńgeıdegi qaýipsizdigi bar kolonııada jazasyn ótep júrgender jazanyń merzimin qaıta esepteýge ótinish bere alady. Sottalǵandardyń tergeý ızolıatorynda ótkizgen bir kúni túrmedegi bir jarym kúnge teńestirilgen bolatyn.
"Sot jazanyń merzimin qaıta eseptep shyǵýǵa mindetti. Osy jumys atqarylyp, 30 sáýirde tıisti qaýly shyǵaryldy. Osydan keıin sot jazanyń merzimi jartysynan asqanyn, sondaı-aq, onyń jasyn eskerip, merziminen buryn shartty túrde bosatý týraly ótinishti qarap, oń sheshim shyǵardy", - dep atap kórsetti Jumaqsanov.
Nartaı Dútbaev 2001-2006 jyldar aralyǵynda Qazaqstannyń ulttyq qaýipsizdik komıtetin basqardy.
2017 jyly 24 tamyzda ony memlekettik qupııany jarııalaǵany jáne qyzmet babyn asyra paıdalanǵany úshin aıyptap, jeti jarym jylǵa bas bostandyǵynan aıyrǵan bolatyn. Oǵan memlekettik qyzmette jumys isteýge tyıym salyndy.
Al 2018 jyly Nartaı Dútbaevtyń jazasyn 12 jylǵa deıin uzartty. Ulttyq qaýipsizdik komıtetiniń eks-basshysyna qosymsha aıyptar taǵyldy. Atap aıtqanda, bılikti teris pıǵylda paıdalaný, senip tapsyrylǵan múlikti ıemdený jáne aqsha jylystatý sııaqty qylmystar bar.
2019 jyly qańtar aıynda Dútbaevtyń jazasyn 10 jylǵa qysqartty.
Qate tapsańyz, qajetti bólikti tańdap ctrl+enter basyńyz.
Pikir qaldyrý
pikir