Almatyda karantın sharalary qaıtadan kúsheıtiledi

Almaty ákimi Baqytjan Saǵyntaev qala turǵyndarynan karantın rejımin kúsheıtý jónindegi jańa sharalarǵa túsinistikpen qaraýdy surady. Bul týraly ol Facebook paraqshasynda jazdy.

Búgin QR Prezıdentiniń tapsyrmasyn, sonymen qatar QR aýmaǵynda koronavırýs ınfeksııasynyń taralýyna jol bermeý jónindegi vedomstvoaralyq komıssııa sheshimin oryndaý úshin Almaty qalasynyń ákimi qalalyq komıssııanyń otyrysyn ótkizdi. Onda qaladaǵy epıdemıologııalyq jaǵdaıdy turaqtandyrý boıynsha qosymsha sharalar qabyldandy.

– Osy oraıda Almatyda da karantın rejımin kúsheıtý boıynsha qosymsha sharalar qabyldandy. Qala turǵyndarynan kóshede júrýin shektetýin suraımyz. Ásirese qart adamdardyń úıde otyrǵany abzal. Qaýipi dendep bara jatqan myna aýrýdy tunshyqtyrý ózimizge baılanysty ekenin esten shyǵarmaıyq, – dep atap ótti Baqytjan Saǵyntaev.

Búgingi kúni Almatyda COVID-19 juqtyrǵan 3217 oqıǵa tirkeldi. Indettiń taralý aýqymyn, Almaty qalasy turǵyndarynyń ómiri men densaýlyǵyn saqtaý úshin demalys kúnderi (senbi, jeksenbi) – 2020 jyldyń 20-21 maýsymynda qosymsha sharalar engiziledi.

Osylaısha, demalys kúnderi koronavırýs ınfeksııasynyń taralý táýekeliniń joǵary bolýy múmkin nysandardyń qyzmetteri toqtatylady:

• «Úıdegi dúkender» formatyndaǵy fılıaldardan ózge iri saýda jelileri (azyq-túliktik jáne azyq-túliktik emes);
• Bazarlar (azyq-túliktik, azyq-túliktik emes, ámbebap), saýda-oıyn saýyq ortalyqtary, saýda ortalyqtary, saýda úıleri;
• Áleýmettik qashyqtyqty jáne sanıtarlyq epıdemıologııalyq normalardy saqtaǵan kóshe formatyndaǵy ashyq aspan astyndaǵy nysandardan ózge qoǵamdyq tamaqtaný nysandary;
• Qalalyqtar jappaı shoǵyrlanatyn oryndar, onyń ishinde jaıaý júrginshiler aımaqtary, serýendeıtin kósheler, parkter, skverler, ózen arnalary, jaǵajaı, akvaparkter, alańdar, balalar men sport alańdary jáne t. b.
• Almaty qalasy aýmaǵyndaǵy týrıstik aımaqtar;
• Fıtnes-ortalyqtar.

Budan ózge, 20-21 maýsym kúnderi qoǵamdyq kóliktiń jumysy toqtatylady.

Aıta keteıik, jumystary toqtaǵan barlyq nysandarǵa sanıtarlyq-profılaktıkalyq jáne sanıtarlyq-epıdemııaǵa qarsy sharalar júrgiziledi.

Qosymsha sharalardyń basty mindeti – koronavırýstyń taralý tizbegin joıý, jańa juqtyrý oqıǵalarynyń táýekelin tómendetý.

Koronavırýstyń taralýyn boldyrmaý jónindegi komıssııa qalalyqtardan qalada júrýdi azaıtýdy, ásirese táýekel sanatyna jatatyn qart adamdarǵa úıde qalýdy usynady.

Eske sala keteıik, epıdemııaǵa qarsy sharalardy buzǵandardyń jeke jaýapkershilikke tartylýy qarastyrylǵan. Polısııa qyzmetkerleri adamdar jappaı jınalatyn oryndarda jańadan engizilgen sharalardyń saqtalýyn qadaǵalaý boıynsha patrýldik qyzmetti kúsheıtetin bolady.