Berik Ýálı: О́zimdi jaqsy sezine bastadym

Koronavırýs juqtyrǵan prezıdenttiń baspasóz hatshysy Berik Ýálı densaýlyǵy týraly aıtty, jazady Qamshy.kz aqparat agenttigi Tengrinews.kz saıtynyń deregin negizge alyp. 

– Mende sımptomdar koronavırýs anyqtalǵannan keıin baıqala bastady. Dene qyzýym joǵarylap, tamaǵyp qyshyp, búkil denem synyp turǵandaı boldy. Dene qyzýymen on kúndeı túspeı qoıdy, keı kúni 39 gradýsqa jetti. Tábetim de bolmady. Dárigerler teksergen kezde pnevmonııa degen dıagnoz qoıdy, hattama boıynsha em jazyp berdi. Kesheden bastap qana ózimdi jaqsy sezine bastadym. Dene qyzýym túsip, tynys alýym da jaqsardy.

Meni emdep shyqqan barlyq dárigerge jáne medısınalyq qyzmetkerge alǵys aıtamyn. Ol kásibıliginiń arqasynda jaǵdaıym jaqsardy, – dedi Berik Ýálı. 

Ol barlyq qazaqstandyqty óz densaýlyǵy men jaqyndarynyń densaýlyǵy úshin karantın erejelerin qatań saqtaýǵa shaqyrdy.

– Áleýmettik qashyqtyqty saqtaý kerek, sanıtar dárigerlerdiń aıtqandaryn oryndaý qajet. Maska taǵyp, qolǵap kııý óte mańyzdy, sondaı-aq qoldy únemi dezınfeksııalaý kerek.

О́kinishke qaraı, meniń egde jastaǵy ata-anamnan da koronavırýs anyqtaldy. Bastapqyda solardyń densaýlyǵy úshin qatty alańdadym. Qazirgi ýaqytta olarǵa medısınalyq kómek kórsetilip jatyr. Bizdiń dárigerler men medbıkelerge taǵy da alǵys aıtamyn. Qazir ata-anamnyń jaǵdaıy qanaǵattanarlyq. Taıaýda jazylyp ketedi degen senimdemin, – dedi baspasóz hatshy.

Eske salaıyq, Berik Ýálıdiń koronavırýs juqtyrǵany týraly 6 maýsymda habarlanǵan bolatyn.