Almatynyń Áýezov aýdanynda jańa oqý jylynda 1200 oryndyq jańa mektep ashylady

Almaty qalasy ákimi Baqytjan Saǵyntaev Áýezov aýdanyna jumys sapary barysynda aýdan turǵyndarynyń balabaqsha men mektepte oryn tapshylyǵy, abattandyrý jáne jumys oryndarymen qamtamasyz etý jónindegi ótinishterin sheshý joldarymen tanysty.

Áýezov aýdanynyń turǵyndary kótergen eń ózekti máseleniń biri –mektepterdegi oryn tapshylyǵy. Búgingi kúni aýdanda 5365 oryn jetispeıdi. 6 myńǵa jýyq adam turatyn Mamyr yqshamaýdanynda 1200 oryndyq mektep salynýda. B. Saǵyntaev qurylys alańyn aralap kórdi jáne qoldanylatyn qurylys materıaldarynyń sapasyn, qurylys jumystarynyń barysyn qatań baqylaýǵa alýdy tapsyrdy. Jańa oqý jylynda salynyp jatqan osy mektepti jáne Aqsaı-3a yqshamaýdanyndaǵy №123 mektep janyndaǵy 400 oryndyq qosalqy nysandy paıdalanýǵa berý josparlanǵan.

Bulardan ózge, aǵymdaǵy jyly bes mektep janynan jalpy syıymdylyǵy 3550 oryndyq qosalqy nysandardyń qurylystary bastalady. Olar – №6 mektep irgesine salynatyn 900 oryndyq, №117 mektep qasyna salynatyn 900 oryndyq, №133 mektep janynan boı kóteretin 400 oryndyq, №132 mektep irgesine salynatyn 800 oryndyq jáne №121 mektep qasynan salynatyn 550 oryndyq nysandar. Osylaısha, Áýezov aýdanynda mektepterdegi oryn tapshylyǵy is júzinde oń sheshimin tabatyn bolady.

Jalpy, qala boıynsha mektepterde 30 myń oryn jetispeıdi. Halyqtyń sany ósýine oraı keler oqý jylynda bul kórsetkish eki esege artatyn bolady. Sondyqtan 2020-2021 jyldary 16 jańa mektep jáne 23 qosalqy nysan salý josparlanǵan, bularda shamamen 47,5 myńy oryn bolady. Iаǵnı, oqýshy ornynyń tapshylyǵy 80 paıyzǵa qysqarady. Qurylys JQJK, MJÁ baǵdarlamalary men jobalary jáne bıznestiń áleýmettik jaýapkershiligi boıynsha ári jeke kásipkerlikti yntalandyrý arqasynda qarqyndy júrýde.

Balabaqshalardaǵy oryn tapshylyǵy máselesin sheshýge turǵyn keshenderin salýmen aınalysatyn kásipkerler kómektesýde. Almaty qalasy ákiminiń tapsyrmasy boıynsha TK salý kezinde áleýmettik nysandar úshin oryndar bólý mindetti túrde qarastyrylýy tıis. Bul bilim berýdiń qalalyq mekemelerine túsetin júktemeni azaıtýǵa septigin tıgizedi. «Úsh suńqar» TK Aqsaı-5 yqshamaýdanynda qurylys salyp jatqan kompanııa 115 oryndyq balabaqsha úshin arnaıy oryn bóldi.

Aýdanda 16 584 balany qamtıtyn 46 memlekettik jáne 122 jeke balabaqsha bar. Memlekettik tapsyrys boıynsha 63 jeke balabaqsha jumys jasaýda. 2019 jyly memlekettik (120 oryndyq) jáne 25 jeke balabaqsha (400 oryndyq) paıdalanýǵa berilgen bolatyn.

2020 jyly toǵyz jeke balabaqshany ashý josparlanǵan, búgingi kúni olardyń úsheýi (178 oryndyq) ashyldy.