"Belsendini óltirdi" delingen kúdikti ashtyq jarııalady

Qaraǵandy oblysynyń turǵyny, belsendi Ǵaly Baqtybaevty tapsyryspen óltirdi dep aıyptalǵan kúdikti Iman Mııashov ózine taǵylǵan aıypqa qarsylyq retinde ashtyq jarııalady. Qaraǵandy tergeý ızolıatorynda jatqan kútiktiniń týystary Qazaqstan bıligin jaǵdaıǵa aralasýǵa shaqyrdy.

– Ulymdy bir jylǵa jýyq qamaýda ustap otyr. Polısııa ony kisi óltirdi dep aıyptaıdy. Ol kúni balam úıde bolmady, dosymen birge týǵan kún toılaǵan, onyń eshqaıda barmaǵanyn rastaıtyn kýágerler bar. Prezıdenttiń meni estýin jáne aralasýyn ótinemin, – deıdi kisi óltirdi dep aıyptalǵan Mııashovtyń anasy Lázzat Qasymova.

Oblystyń qylmystyq-atqarý júıesi departamentiniń aıtýynsha, tergeý boıynsha qamaýǵa alynǵan Mııashovtyń tamaqtan bas tartyp, tek sý ishýge bolatyn ashtyq jarııalaǵany týraly málimdemesi 4 maýsymda túsken.

"Er azamattyń jaǵdaıy qanaǵattanarlyq, medısına qyzmetkerleriniń baqylaýynda. AK-159/1 mekemesinde eki ret óziniń densaýlyǵyna qasaqana zaqym keltirgen, eki jaǵdaıda da oǵan mekeme jaǵdaıynda medısınalyq kómek kórsetildi. Aýrýhanýǵa jatqyzýǵa muqtaj emes. Mııashov bul áreketterin qylmystyq istiń tergelýimen kelispeıtinin bildirý úshin jasaǵanyn aıtady. Mekeme ákimshiligine shaǵymy joq" dep jazdy departament bastyǵynyń orynbasary Bekbolat Shákirov retinde.

Mııashov – Qaraǵandy oblysy Jańaarqa aýdanynyń turǵyny belsendi Ǵaly Baqtybaevty óltirdi dep aıyptalǵan tórt kúdiktiniń biri. Aýdanynyń áleýmettik máselelerin kóterip júrgen belsendini 2019 jyly 28 mamyrǵa qaraǵan túni óz úıiniń aldynda basyna oq atyp óltirip ketken.