QR BǴM Ulttyq testileý ortalyǵynyń dırektory Dıdar Smaǵulov atap ótkendeı, bıyl Ulttyq biryńǵaı testileý belgilengen 161 orynda ótedi.

Elimizdiń óńirlerinde pandemııa jaǵdaıynda karantındik shekteýlerdi saqtaı otyryp, testilenýshilerdiń ómiri men densaýlyǵynyń qaýipsizdigin qamtamasyz etý úshin medısınalyq-sanıtarııalyq sıpattaǵy kúsheıtilgen sharalar qabyldandy: testileý pýnktterine kirý keminde 2 metr qashyqtyqty qatań saqtaı otyryp júzege asyrylatyn bolady; árbir testilenýshi baqylaýdyń 5 kezeńinen ótedi.

 

Anyqtama:

Dezınfeksııa kezeńderi:

  • syrtqy kıimdi dezınfeksııalaý eritindisimen zararsyzdandyratyn arnaıy tonnel arqyly ótý;

  • aıaq kıimdi arnaıy kilemmen dezınfeksııalaý rásimi

  • qoldy arnaıy suıyqtyqpen óńdeý prosedýrasy;

  • termobaqylaý rásimi. Joǵary temperatýra anyqtalǵan jaǵdaıda testilenýshige kezekshi brıgada men medısına qyzmetkerleri jedel kómek beredi;

  • respıratorlyq nemese ádettegi medısınalyq maskalardy berý.

 

Sáıkestendirý uıaly telefon kamerasynyń betti taný arqyly qashyqtan ótedi.

D.Smaǵulovtyń aıtýynsha, testileý pýnktteriniń árbir qabatynyń dálizderinde sanıtaızerler ornatylady, al dálizdegi jáne aýdıtorııalardaǵy barlyq esikter aldyn ala ashyq jaǵdaıda bolady. Budan basqa, testilenýshilerdi otyrǵyzý aýdıtorııalardy mindetti túrde jeldetip, keminde 2 metr qashyqtyqty saqtaı otyryp júzege asyrylatyn bolady.

Adamdardyń jappaı jınalýyn boldyrmaý úshin, sondaı-aq karantındik sharalardy saqtaý maqsatynda ata-analarǵa UBT-ǵa túlekterdi ákelýge jáne olardy testileý ótetin ǵımarat aýmaǵynda kútýge tyıym salynady. Ol úshin jergilikti atqarýshy organdardyń kúshimen balalardy UBT-ǵa tasymaldaýdy uıymdastyrý qamtamasyz etiledi, al testileý pýnktteriniń aýmaqtaryn quqyq qorǵaý organdarynyń qyzmetkerleri qorshaıtyn bolady.