15 Maýsym, 2020 Dástúr

Anańyz shynynda baqytty ma?

Kórneki sýret

Siz, "Anam shynaıy baqytty ma?" – degen suraq tóńireginde bir sát oılanyp kórdińiz be? Meniń oıymsha, kóp adam ol týraly oılanbaıdy. О́ıtkeni kez kelgen ata-ana urpaǵy aldynda baqytsyz bolyp kóringisi kelmeıdi. "Baqytsyz kórinsem, balalarymnyń júregi jaralanady" dep alańdaıdy. Al balalary "anamdy baǵyp-qaǵyp otyrmyn" dep oılaıdy.

Esińizde me, sonaý baldáýren balalyq shaǵyńyzda áldeqalaı dastarhanǵa kelgen tátti-dámdini anańyz sizdiń aýzyńyzǵa tóseıtin. Sonda "anashym, ózińiz de jeńizshi" dep aıtar bolsańyz, "jeı ǵoı qulynym, men álginde jep, toıyp alǵanmyn" dep "ótirik" aıtady.

Eseıgen soń da qansha jerde "ótirikti shyndaı, aqsaqty tyńdaı" etip, birdi-birge soǵyp júrseńiz de, anańyzdyń sol "ótirigine" áli senip kelesiz. Bir mysal, aýyrýy janyna batyp otyrǵan anańyz "túk etpeıdi, az myzǵap alsam táýir bolyp qalamyn, alańsyz jumysyńa júre ber" dese, alshań basyp jumysqa kete beresiz.

Endi bir mysal, siz keıde "anashym, jazǵy demalysta, kelinińiz ekeýimiz shetelge saıahattap barsaq degen oıymyz bar. Nemerelerińizge 10 kún boıy ózińiz qaraı alasyz ba?" dep surasańyz. Anańyz ájim basqan júzine kúlki úıirip "alańsyz baryp kelińder, qoshaqandaryma ózim ádettegideı bas-kóz bolamyn" deıdi. Biraq osy sát siz anańyzdyń aýyldan, qala berdi oblys ortalyǵynan ary attap shyǵyp kórmegen adam ekenin eskermeımiz. Onyń da el men jerdi kórgisi keletin jumyrbasty pende ekenin káperińizge de almaısyz.

Mine, dostar sizder analaryńyzdy tek, ózińizdiń ıgiligińiz úshin Qudaı taǵala áýelde atap, soǵyp qoıǵan qundy dúnıedeı ǵana baǵalaısyzdar.

Esińizde bolsyn, analaryńyz ómir boıy eki adamnyń rólin oınap ótedi. Birinshisi – júregi keń ananyń, ekinshisi – qarapaıym adamnyń róli. Sizder onyń aldyńǵy rólin ǵana kóresizder de, adam retindegi sońǵy rólin kórmeısizder, ashyǵyn aıtqanda, kórýge tyryspaısyzdar. Ol sizge ana, oǵan daý joq. Dese de ol – adam, ol – bireýdiń qyzy, bireýge jar, bireýge ápke-sińli, al endi bireýdiń dosy, áriptesi, básekelesi, bireýge bastyq, bireýge qyzmetker t.b. osylaısha kete beredi. Onyń da qalaýy, armany, talǵamy, jaqsy nemese jek kóretini bar. Alaıda osyny eskeretin ul-qyzy bar ma? Múlde joq emes-aý, bar, biraq olardyń sany tym az ekenine senemin.

Dostar, bir ǵumyr tek, sizdiń baqytyńyz úshin ot pen sýǵa túsetin, sizdi baqytty etemin dep, ózin "ótirik" baqytty kórsetetin anańyz shynynd da baqytty ma? Bir sát oılanyp kórińizshi. Aıtpaqshy, anańyzdyń qasynda, basyn bult shalyp, naızaǵaı tónip, jańbyr jýsa da, kún men jel qaqtap kemirse de, qalpyn buzbaı, demin ishinen alyp tura beretin ákeńizdiń de baryn umytpańyz.

Qaster Sarqytqan
Abaı at.QazUPÝ ustazy

Ilmek sózder: Ata-ana

Qate tapsańyz, qajetti bólikti tańdap ctrl+enter basyńyz.

Banner

Pikir qaldyrý

pikir