118 mln teńge bıýdjet qarajatyn jymqyrǵan kásipkerler sottaldy

Elorda kásipkerleri 118 mln soma kólemindegi bıýdjet qarajatyn jymqyrǵany úshin sottaldy. Bul týraly qarjy monıtorıngi komıteti habarlady.

"Qarjy monıtorıngi komıteti Nur-Sultan qalasynda «QazIndustry» (qazaqstandyq ındýstrııa jáne eksport ortalyǵy) AQ bıýdjettik aqsha qarajatyn jymqyrý faktisi boıynsha 2 kásipkerge qatysty qylmystyq tergeýdi aıaqtady. Aıyptalýshylar kásiporyndarǵa jalǵan tulǵalardy rásimdep, is júzinde negizgi qyzmetti ózderi júrgizip otyrǵan. Nur-Sultan qalasynyń Esil aýdany sotynyń úkimimen kásipkerler QR qylmystyq kodeksiniń 190-babynyń 4-taraýy boıynsha (alaıaqtyq) kináli dep tanylyp, árqaısysyna 5 jyl bıýdjet qarajatyn alýǵa qatysty qyzmetpen aınalysý quqyǵy men 6 jylǵa bas bostandyǵynan aıyrý jazasy taǵaıyndaldy. Sot sonymen qatar yntymaqtyq tártipte kásipkerlerden «QazIndustry» (qazaqstandyq ındýstrııa jáne eksport ortalyǵy) AQ paıdasyna múliktik zalal esebinde 118 mln teńge men memleket kirisine ár kásipkerden 1 mln 770 myń teńgeni memlekettik bajǵa óteý túrinde óndirip alýǵa qaýly shyǵardy" delingen habarlamada.