Brıtanııalyq gazet: Máskeýde koronavırýstan qaıtys bolǵan myńdaǵan derek tirkelmegen

Brıtanııalyq The Independent basylymy Máskeýde koronavırýstan qaıtys bolǵan myńdaǵan adam óliminiń tirkelmegenin málimdedi. Bul týraly Qamshy tilshisi habarlaıdy.

– Reseı jýrnalısi mamyr aıynda Máskeýde alty myńǵa jýyq adam qaıtys bolǵanyn habarlady, – dep jazdy brıtanııalyq basylym.  

The Independent-tyń aqparatynsha, «Eho Moskvy» radıostansııasynyń redaktory Alekseı Venedıktov Máskeýde qaza tapqandardyń sany 15 700-ge jetkenin jarııalaǵan. Bul úsh jyldyq ortasha kórsetkishten 60 paıyzǵa joǵary.

– Eger bul san shyn bolsa, resmı statıstıkaǵa kúmán týady. Resmı statıstıka boıynsha mamyr aıynda Covid-19 boıynsha 1474 ólim tirkelgen, – dep jazdy The Independent. Basylymnyń taldaý jasaýynsha, bul statıstıkalar Máskeýde koronavırýstan ólgen myńdaǵan adamnyń tirkelmegenin bildiredi. 

Gazettiń aqparatyna sáıkes, Reseı buǵan deıin "resmı statıstıka koronavırýstyq ólimniń naqty sanyn tómendetip kórsetken bolýy múmkin" degen málimdemege shamdanyp jaýap qaıtarǵan. Osy aptanyń basynda, CNN-ge bergen suhbatynda Kreml ókili álemdik tendensııalarǵa sáıkessizdik tek reseılik medısınanyń «tıimdiligine» baılanysty ekenin aıtqan.