Elordada jýrnalısterdiń beıbit jınalystar kezindegi qyzmettik Qaǵıdalary talqylandy

Búgin Nur-Sultan qalasynda QR Aqparat jáne qoǵamdyq damý mınıstri Aıda Balaevanyń tóraǵalyǵymen jýrnalıstiń beıbit jınalystar kezindegi qyzmettik Qaǵıdalaryn onlaın-talqylaý ótti.

Onlaın-talqylaýǵa Aqparat jáne qoǵamdyq damý mınıstrliginiń ókilderi, respýblıkalyq jáne óńirlik BAQ, sondaı-aq úkimettik emes uıymdardyń basshylary qatysty. Is-sharany "Bas redaktorlar klýby" qoǵamdyq birlestigi uıymdastyrdy.

Qaǵıda "Qazaqstan Respýblıkasynda beıbit jınalystar uıymdastyrý jáne ótkizý tártibi týraly" jańa Zańdy iske asyrý sheńberinde zańnamaǵa engizilgen sońǵy túzetýlerge sáıkes ázirlendi.

Onlaın-talqylaý bastalmas buryn A.Balaeva atalǵan Qaǵıdalar jergilikti atqarýshy organdar men BAQ-tyń ózara is-qımyl tártibin anyqtaý úshin, sondaı-aq, beıbit jınalystar ótkizý oryndarynda ózderiniń kásibı qyzmetin júzege asyrý kezindegi jýrnalısterdiń qaýipsizdigin qamtamasyz etý úshin qajet ekenin atap ótti.

"Jýrnalıstiń kásibı qyzmetin alańsyz atqarýy maqsatynda jergilikti atqarýshy organdar BAQ qyzmetkerlerine arnalǵan jedel baspasóz-ortalyqtarymen qamtamasyz etedi", - dep atap ótti ol.

Mınıstr jańa Qaǵıdada jergilikti atqarýshy bılik ókilderiniń BAQ-pen ózara is-qımyly boıynsha fýnksııalar engizilgenin, sondaı-aq erekshelik belgileriniń túrlerin bekitý qarastyrylǵanyn aıtty.

Onlaın-talqylaý barysynda "Ádil sóz" sóz bostandyǵyn qorǵaý halyqaralyq qorynyń prezıdenti T. Qaleeva, Informburo.kz aqparattyq portalynyń bas redaktory M. Dorofeev, Internews Network Qazaqstandaǵy ókildiginiń zańgeri O.Dıdenko, "Almaty" telearnasynyń bas dırektory N. Muhamedjanova, "Chelovek ı zakon" gazetiniń bas redaktory M. Báshimov ózderiniń naqty usynystary men eskertpelerin jetkizdi.

Sóz sóılegender erekshe belgilerdiń túrlerine, jedel baspasóz ortalyǵynyń aýmaǵynda da, odan tys jerlerde de jýrnalısterdiń erkin júrip-turýyn qamtamasyz etýge, redaksııalyq tapsyrmanyń bolýyna, jergilikti atqarýshy organdardyń ókilderine de osy Qaǵıdanyń erejelerin túsindirýdiń mańyzdylyǵyna qatysty óz pikirleri men usynystaryn aıtty.

Jalpy talqylaýǵa usynylǵan Qaǵıda jobasyn kezdesýge qatysýshylar tolyq qoldady.

Onlaın-talqylaýdy qorytyndylaı kele, A. Balaeva ÚEU men óńirlik BAQ ókilderiniń barlyq usynystary men eskertýleri egjeı-tegjeıli zerdelenetinin jáne eskeriletindigin, al joba ary qaraı talqylaý úshin normatıvtik-quqyqtyq aktilerdiń ashyq portalynda jarııalanatynyn atap ótti.