• USD 405.69
  • EUR 455.51
  • RUB 5.72
  • CNY 57.42

10 Maýsym, 2020 Barlyq aımaqtar

Qoryqqan – boıǵa qut

Dáýletkereı Kápuly

"Álem elderi bul kúnde shybyndaı jannyń esendigi úshin baryn salyp arpalysyp jatyr. Qytaıdan bas alǵan «aty jaman» indettiń álemniń ár turǵynyn uıqy-kúlkiden aıyryp, alańdaýly kúıge túsirer dep bes-alty aı buryn eshkim de oılaǵan joq. Qazaq balasy «kóppen kórgen uly toı» degendi kóbinde jaqsylyqqa jorı aıtatyn. О́kinishke qaraı kóppen birge kórer qıynshylyq bizdiń de eldiń basyna túsken syn saǵatta El Prezıdenti men Úkimet músheleriniń uıqy-kúlki kórmeı jurtymyzdyń bas amandyǵyna jasap jatqan qımyl-áreketteri júregimizdegi úmit shoǵyn úrleı túskenine qýandyq! Árıne, el basshylary men qaıratker tulǵalardyń tynymsyz áreketi men qosa jalpyhalyqtyń yntymaqqa ymyralasyp, judyryqtaı jumylǵany qajet!

Aqparattyq keńistiktiń tym erkindigi de «qoryqqanǵa qos kórinetin»  ýaqytta halyqtyń úreıin ushyrýǵa beıil-aq. Tártiptiń temirdeı qattylyqqa kóshkenine moıynusynyp, berekeniń kelekege aınalmaýyn ár qazaqstandyq azamat bilýge jáne saqtaýǵa tıisti ekenin, óz densaýlyǵymen qatar Ult qaýipsizdiginiń kepili bolaryn bilgen jón. Taǵdyrdyń talaı ashy dámin tatqan, basynan ótkergen aty jaman oba men tyrysqaqty da jeńip, ashtyq pen qastyqty da kórgen Alash balasy bul bulaǵaı kúnderdi de artqa tastaıtynyna kóńil sener.

Tuńǵysh Prezıdent – Elbasy da el-jurtty berekege shaqyryp, ultym deıtin Azamattarǵa tastap jatqan jaýapty da saýapty úndeýi – kósheli Ult kóseminiń kórgendi de kóregen saıasatkerligi! Osy rette bir adamnyń jaýapkershiligin atam qazaq «jalǵyz qýraı – jel jarar» dep beınelep aıtqan eken. Mamyrajaı kúnde maı kekirip otyryp toılar toı-tomalaqty da doǵara turýǵa sabyr-shydamymyz jetetin el emes pe edik?! Karantın rejımin sál bosańsytqanǵa japatarmaǵaı ashyq-shashyqtyqqa kóshýge áli erte ekenin eskertken El úkimetiniń sózin qulaqqa nege ilmeımiz?!

«Qoryqqanǵa qos kórinetin» ýaqytta bázbireýlerdiń «kórshiniń órtengen shóbine bas, sıraq úıtip» alǵysy keletin pasyq pıǵylyna ere ketýge jol bermesek eken. Alańǵa shyǵyp, attan salyp aıǵaılaǵannan ulttyń túgendeler upaıyn kórip turǵan joqpyn. Qysyltaıań shaqta qulaq sarsytar qańqý sózge ere ketý – órkenıetti qoǵam ókiliniń tirligi emes ekenin túsiner óremiz qaıda?!

«El búlinip, Ertis buzylǵan joq»! Mán-maǵynasyz «beıbit sherýletip», dál osy tusta aıǵaıǵa súren qosyp, aıtaqqa úre jónelerdeı esh negiz joq sekildi. Sol «alań ańsaǵan» aǵaıyndardyń myna pandemııalyq jaǵdaıda jalpy kóptiń densaýlyǵyna kepildik bere almaıtyny bes eneden belgili. Tym bolmaǵanda atyń óshkir indettiń aýyzdyqtalýyna árqaısymyzdyń jaýapkershilikpen qaraýǵa sana-sezimimiz jetpese sol, Eldigimizge úlken syn! Tipti, álemdi ábigerge túsirgen juqpaly dertke qoǵam arasynda áli kúnge senbeıtinderdiń qarasy kóbeıgeni janyńdy qynjyltatyny ras. Dúnıe júzin alańdatqan, sharýasyn shatqaıaqtatqan pandemııadan saıası astar izdeýdiń kókirek kózi ashyq qazaq balasyna uıattylaý da tirlik ekeni janyńdy aýyrtady. Memlekettik shekarań shegendelip, kók aspanda qyran qanatty baıraǵyń jelbirep turǵanda qara aspandy tóndirý, jańbyr jaýmaı sý bolý – qanshalyqty aqylǵa syıymdy?! 

Keıde «at shapqanǵa ıt shapqan» tirlikti doǵara almaı qalatyn elmiz be deımin. Yntymaqty ydyramaı turyp oılaǵan ata-baba urpaǵy emes pe edik, samaýryn tasyǵanyn Samarqandy sý aldy dep estıtin enjar qulaqtyq dál bizdiń ult ókilderine jaraspas?! «Qoryqqan boıǵa qut» degen atam qazaq! Berekeniń buzylýynan qorqaıyq, jaman indettiń el ishine keń jaıylýynan qorqaıyq!

El Prezıdenti Qasym-Jomart Kemeluly salqynqandy saıasatker retinde alys-jaqyn elderdiń pandemııalyq apatpen kúresýdiń ozyq tájirıbelerine súıene otyryp, eldegi jaǵdaıdy barynsha halqymyzǵa tıimdi jaqta qarastyryp, tıisti tapsyrmalar men shekteýlerdi qolǵa alǵany kókeıge qonymdy is boldy. Endi osy naqty sharalardyń oń nátıjelerin kórýimiz úshin judyryqtaı jumylǵanymyz abzal bolar.  Sanaly halyq ókili retinde ár otandastyń azamattyǵy men ary synǵa túsken shaqta taǵy da «malyń menen janyńdy sadaǵa dep, ardyń týyn kótergen» Alash balasynyń berekege uıyp, tártipke baǵynyp, kesapattyń  qaqpan tilin baspaıtyndyǵyna senip, jamandyqty amandyq jeńetinin jarqyn kúnderge birge jeteıik, Túnderińiz tynysh, kúnderińiz mamyrajaı bolsyn, Alash balasy!"                                       

Dáýletkereı Kápuly

QR Eńbek sińirgen qaıratkeri.

Ilmek sózder: Prezıdent álem el

Qate tapsańyz, qajetti bólikti tańdap ctrl+enter basyńyz.

Banner

Pikir qaldyrý

pikir