Álıhan Smaıylov: Elimizdiń jalpy ishki ónimi tómendedi

Úkimet basshysynyń birinshi orynbasary Álıhan Smaıylov ekonomıkanyń oń ósimine qol jetkizý úshin mınıstrlikter men jergilikti atqarýshy organdar belsendi jáne úılesimdi jumys isteýi kerektigin málim etti.

– Bes aıdyń qorytyndysy boıynsha koronavırýs pen álemdik suranystyń tómendeýine baılanysty elimizdiń jalpy ishki ónimi tómendedi. Degenmen aýyl sharýashylyǵynda, óńdeý ónerkásibinde, azyq-túlik, qurylys materıaldary óndirisinde, farmasevtıkada, mashına jasaýda, qurylysta turaqty ósim baıqalady. Osy jyldyń mamyr aıynda aldyńǵy aımen salystyrǵanda saýda jáne kólik salalarynda ekonomıkalyq belsendilik qarqyndy ósýi baıqalady. Úkimet 5,9 trln teńgeni quraıtyn daǵdarysqa qarsy shuǵyl sharalar keshenin qabyldady. Ol qarajatty bıýdjettik baǵdarlamalar ákimshileri ekonomıkaǵa ýaqtyly jetkizýleri óte mańyzdy, – dedi Álıhan Smaıylov Úkimet otyrysynda.

Úkimet basshysynyń orynbasary «Jumyspen qamtýdyń jol kartasy», «Eńbek» jáne basqa da memlekettik baǵdarlamalardyń tıimdi oryndalýyn qamtamasyz etý qajettigin atap ótti.

– Premer-mınıstrdiń tapsyrmasyna sáıkes qazirgi tańda memlekettik organdar men jergilikti atqarýshy organdardyń ınvestısııa tartý josparlary naqtylandy. Jalpy somasy 44 trln teńgeni quraıtyn 2 myńǵa jýyq jobany júzege asyrý josparlanýda. Investorlarmen tikeleı jumysty kúsheıtýmen qatar daǵdarysqa qarsy shuǵyl sharalardyń barlyq paketin jáne ekonomıkany qalpyna keltirýdiń keshendi josparyn iske asyrý osy jyldyń sońyna deıin ekonomıkanyń oń ósimine qol jetkizýge múmkindik beredi. Ol úshin mınıstrlikter men jergilikti atqarýshy organdar belsendi jáne úılesimdi jumys isteýi kerek, – dedi Álıhan Smaıylov.