Polıseıdi tistegen pavlodarlyq 5-ten 10 jylǵa deıin sottalýy múmkin (vıdeo)

Polısııa qyzmetkeriniń qulaǵyn tistep alǵan pavlodarlyq turǵyn besten on jylǵa deıin sottalýy múmkin. Bul týraly oblystyq polısııa departamenti habarlady. Keleńsiz oqıǵa demalys kúni oblys ortalyǵyndaǵy kóp qabatty úılerdiń esik aldynda bolǵan, dep jazady Astana telearnasy. 

Jarııalanǵan beınejazbada pavlodarlyq turǵynnyń otbasymen turǵanyn, ári otaǵasynyń áldeneni iship turǵanyn anyq baıqaýǵa bolady. Keıin olardyń qasyna tártip saqshysy jaqyndap, kýáligin kórsetedi. Al olar polıseıdiń qolyndaǵy qujatty qaǵyp jiberedi. Artynsha olar jaǵa jyrtysqan. Polıseı jaraqat alǵan. Oqıǵa kýágeri tártip buzyshynyń – áıeli. Onyń aıtýynsha, kúıeýi ishimdik ishkenimen, mas bolmaǵan. 

– Polısııa qyzmetkeri joldasymdy balamen birge qatty ıterip jiberdi. Sol sátte balam basymen úıdiń qabyrǵasyna soǵyldy. Ol nebári 7 aılyq ǵana. Sosyn jedel járdem shaqyryp, aýrýhanaǵa bardyq. Balamnyń basyna zaqym kelgen. Qolymda anyqtamam da bar, – deıdi Angelına Chepýrnaıa.

Polısııa departamentiniń málimetinshe, janjalǵa turǵynnyń qoǵamdyq orynda ishimdik ishkeni sebep bolǵan. Onymen qoımaı ol tártip saqshysyna dóreki minez kórsetip, bılik ókilin soqqyǵa jyqqan.

Qazirgi ýaqytta qylmysker qamaýǵa alynyp, QR Qylmystyq kodeksiniń 380-babynyń 2-bóligi boıynsha is qozǵalypty.

– Polısııa qyzmetkeri shabýyl jasaýshyǵa eshqandaı qarsy áreket jasap nemese qorǵanys quraldaryn qoldanǵan joq. Sebebi shabýyldaýshynyń qolynda balasy boldy. Sol sebepten polıseı óz-ózin tek soqqydan ǵana qorǵap qımyl jasady. Tipti, vıdeoda shabýyldaýshy ony soqqylap jatsa da, balany qorǵaý úshin áreket etip, ustap qalǵany kórinedi. Al shabýyldaýshy polıseıdi uryp, aıaqpen teýip, qulaǵyn tistep dene jaraqatyn saldy, – deıdi oblystyq polısııa departamentiniń basshysy Nurlan Másimov.

Tóbelestiń shyǵýyna polıseıdiń kinásiniń bar-joǵy anyqtalmaq. Ol úshin qyzmettik tekserý bastalypty. Polısııa buzaqynyń buǵan deıin de qylmysy úshin sotty bolǵanyn aıtady. Eger onyń kinási dáleldense, 5 jyldan 10 jylǵa deıin bas bostandyǵynan aıyrylýy múmkin deıdi.