ShQO-da Covid-19 pandemııasy aıasynda jazǵy týrıstik maýsymǵa daıyndyq jumystary júrgiziledi

Shyǵys Qazaqstandaǵy demalys oryndarynyń ıeleri 11 mamyrdan bastap týrısterdi qabyldaý úshin daıyndyq jumystaryn júrgizedi. Bul týraly ShQO aqparattyq ortalyǵynda ótken brıfıng barysynda týrızm jáne syrtqy baılanys basqarmasy basshysynyń orynbasary mindetin atqarýshy Inara Bodýkova málim etti.

 

Sanatorııalyq-kýrorttyq jáne emdeý-saýyqtyrý ortalyqtarynda týrısterdi qabyldaýǵa 3 maýsymnan bastap ruqsat berildi. Al  6 maýsymnan bastap jáne Úrjar aýdanynda 13 maýsymnan bastap rekreasııalyq basqa da týrızm túrleri boıynsha demalýǵa kelýshilerdi qabyldaýǵa bolady. Osy maqsatta kásipkerlerge respýblıka jáne oblystyń bas memlekettik sanıtarlyq dárigerleriniń qaýly erejeleri jetkizildi. Nysandardyń jumys algorıtmderi, demalýshylarǵa qoıylatyn talaptar túsindirildi. Brıfıngke qatysqan Inara Bodýkova osylaı dedi.

 

- Tamaqtaný oryndarynda kelýshilerdiń toltyrylýy jáne bir mezgilde bolýy jalpy jobalyq syıymdylyqtyń 50 paıyzynan aspaýy tıis. Týrısterdiń ortasynda 2 metr qashyqtyq saqtalýy kerek, - dedi Irına Bodýkova.

 

Brıfıng barysynda oblystyń  memlekettik bas sanıtar dárigeri Marat Ismaılov týrısterge merzimi ótpegen (nátıjelerdi alǵan kúnnen bastap 7 kúnnen keshiktirilmeı berilgen) COVID-19 zertteýlerinen ótý nátıjeleri týraly anyqtamasy (jedel testileý, PTR zertteý) bolǵan jaǵdaıda ǵana demalýǵa ruqsat beriletinin atap ótti. Bir otbasy úshin onyń bir múshesiniń zertteý nátıjesi jetkilikti.

 

- Rekreasııalyq aımaqtarda demalýshy adamdar turatyn oryndarda, jalpy paıdalaný jáne adamdar kóp jınalatyn jerlerde maskalyq rejımdi jáne áleýmettik qashyqtyqty (bir otbasy múshelerin qospaǵanda, keminde eki metr) qatań saqtaýy kerek. Temirjol jáne áýe kólikteri obektilerinde profılaktıkalyq jáne epıdemııaǵa qarsy is-sharalary Qazaqstan Respýblıkasynyń Bas memlekettik sanıtarııalyq dárigeri men kóliktegi Bas memlekettik sanıtarııalyq dárigeriniń qaýlylaryna sáıkes júrgiziledi, - dedi Marat Ismaılov.