Nazarbaev: Ondaıdy eshqashan jasaǵan emespiz

Beınebaılanys arqyly shyqqan úkimet basshysy Asqar Mamın bıylǵy jylytý maýsymynda astanada gaz jaǵylatynyn jetkizdi.

"Aldaǵy jylý berý maýsymynda Nur-Sultan qalasy gazdy qabyldaıdy. Búginde "Saryarqa" gaz qubyry paıdalanýǵa berildi. Qubyrdyń ishinde qysym bar. Qazirgi kezde JES-2-ni gazǵa aýystyrý jumystary atqarylyp jatyr", – dedi Mamın.

Premer-mınıstrdiń aıtýynsha, astanada gaz taratý júıeleri iske asyrylýda. Bıyl nysandardyń biraz bóligi gazǵa qosylady.

"Budan bólek, Temirtaýdy gazǵa kóshirý sharalary júrgizilýde. Qaraǵandy men Jezqazǵanda biraz jumys jasaldy. Jalpy, qazirgi kezde qubyr jelisiniń boıynda jatqan barlyq iri eldi mekenderdi aldaǵy jylytý maýsymynda gazben qamtýǵa tyrysamyz", – dep atap ótti Mamın.

Elbasy óz kezeginde iri gaz qubyrynyń alǵash salynǵanyna toqtalyp, sonyń arqasynda ekologııanyń jaqsaratynyn da erekshe atap ótti.

"Biz alǵash ret ońtústikten soltústikke úlken gaz qubyryn tarttyq. Ondaıdy eshqashan jasaǵan emespiz. Endi, osyny halyqtyń ıgiligine jaratý qajet, halyq sezinýi kerek. Sonyń arqasynda Nur-Sultannyń ekologııasy jaqsarady, qalalar gazben qamtamasyz etiledi. Halyq múldem basqasha ómir súretin bolady", – dedi Nazarbaev.

Nur-Sultandy gazdandyrý qalaı júrip jatyr?

Ákimdik málimeti boıynsha ónerkásip keshenderi men turǵyn úı sektorlaryn gazdandyrý úsh kezeńnen turady.

Aldaǵy jylý berý maýsymynda Kóktal-1, Kóktal-2, Agroqalashyq, Promyshlennyı, Jeleznodorojnyı turǵyn úı alaptaryna gaz jetkiziledi degen jospar bar.

Ekinshi kezeńde Mıchýrıno, Internasıonalnyı, Kúıgenjar (1-2-shi iske qosý kesheni), Telman (3-shi iske qosý kesheni), Prıgorodnyı, Garden Village jáne Family Village (4-shi iske qosý kesheni) turǵyn úı alaptary kógildir otynmen qamtamasyz etiledi.

Úshinshi kezekte Ilınka (1-2-shi iske qosý kesheni), Shubar (3-shi iske qosý kesheni), О́ndiris (4-shi iske qosý kesheni) turǵyn úı alaptaryna tartylady.

Jobalardy iske asyrý merzimi 2020-2023 jyldar aralyǵyn qamtıdy.