Berik Ábdiǵalıuly: Táýelsizdiktiń 30 jyldyǵyna oraı tarıhı ádildik ornaıdy dep senemiz

Memleket jáne qoǵam qaıratkeri, saıasattanýshy Berik Ábdiǵalıuly prezıdent Toqaevtyń saıası qýǵyn-súrgin qurbandaryn aqtaý úshin arnaıy memlekettik komıssııa qurý týraly tapsyrmasy tarıhı ádildikti ornatýǵa sep bolady degen pikirde.

– Men buǵan deıin de osy máseleni tereńirek zertteý kerektigin aıtyp, pikir bildirip júrdim. Prezıdenttiń bul málimdemesin qos qoldap qoldaımyn degim keledi. Qazirgi ýaqytta asharshylyq kezinde qaza tapqan adamdardyń sany da naqty emes. Bireý 1 mln deıdi, endi biri odan da kóp dep jatady. Eń aldymen qansha adamnyń qaza tapqanyn bilýimiz kerek. Buǵan deıin de arhıvter ashylyp, zerttelýi kerek edi. Ýkraına asharshylyq kezindegi málimetterdiń barlyǵyn derlik zerttep, bilip aldy. Biz shejirelerimizdi zerttessek kóptegen málimet jınaımyz dep oılaımyn. Endi Qazaqstan aldaǵy Táýelsizdiktiń 30 jyldyǵyna oraı tarıhı ádildik ornaıdy dep senemiz, – deıdi Berik Ábdiǵalıuly. 

Sondaı-aq saıasattanýshy tarıhı ǵylymdardyń doktory Darhan Qydyráliniń "asharshylyq qurbandaryn eske alatyn arnaıy kún belgilengeni jón" degen bastamasy óte oryndy ekenin aıtty.

– Bul da quptarlyq usynys. Asharshylyq pen qýǵyn-súrgin tarıhı turǵyda jaqyn ýaqytta bolǵanymen, ekeýin eki bólek qarastyryp, zerttese quba-qup bolar edi. О́ıtkeni eki másele de tereń úńilýdi, aqtańdaqtardy ashýdy qajet etedi. Sonyń ishinde halqymyzǵa úlken náýbet bolǵan asharshylyqtyń shyndyǵyn tolyqtaı ashý, Qansha qazaqtyń qaza tapqanyn anyqtaý – kezek kúttirmeıtin másele, – dep sózin túıindedi qoǵam qaıratkeri.