Aqtóbeniń hrom zaýytynda taǵy bir jumysshy qaıtys boldy

Aqtóbe hrom qosyndylary zaýytynda jaraqat alǵan 32 jastaǵy jumysshy 3 maýsymǵa qaraǵan túni qaıtys boldy.

Zaýytta kúıik shalǵan 2 jumysshy aýyr hálde oblystyq jedel járdem aýrýhanasyna jetkizilgen bolatyn. Sol jerde bir apta em qabyldaǵan 32 jastaǵy júrgizýshi búgin kóz jumdy. 

– Bir aptaǵa jýyq Aqtóbedegi jedel járdem aýrýhanasynyń reanımasııa bóliminde bolǵan jumysshy aýyr jaraqattan aıyǵa almady. Onyń denesiniń 60 paıyzy kúıgen, – dedi aýrýhananyń bas dárigeri Sáken Qapanov.

О́ndiriste jaraqat alyp, aýrýhanaǵa túsken taǵy bir jumysshy 3 maýsym kúni reanımasııadan travmatologııa bólimine aýysqan. Naýqas 36 jasta. Dárigerler onyń jaǵdaıy jaqsara bastaǵanyn aıtady.

Aıta keteıik, oqys oqıǵa 28 mamyr kúni tús aýa hrom qosyndylary zaýytynyń №4 sehynda bolǵan. Zaýyttaǵy syıymdylyǵy 50 tekshe metr bolatyn bóshkeni tazartqan 4 jumysshy oqıǵa ornynda mert boldy.

Aqtóbe oblystyq polısııa departamentiniń habarlaýynsha, jumysshylar óliminen soń Aqtóbe hrom qosyndylary zaýytynyń úsh qyzmetkeri qamalǵan. "Eńbekti qorǵaý qaǵıdalaryn buzdy" dep kúdikke ilingen úsh adamnyń ústinen QR QK 156 babynyń 4-bólimi boıynsha qylmystyq is qozǵalǵan. Kúdikke ilingenderdiń biri – №4 seh basshysy. Qalǵan ekeýi – seh sheberleri oqıǵa bolǵan kúni sehta kúndizgi aýysymda bolǵan.