Serikbaı Turumov: Az shyǵyn, kóp kiris

Mańǵystaý oblysynyń ákimi Serikbaı Trumov oblystyq máslıhattyń sessııasynda óńirdiń damý strategııasy men bıýdjet shyǵynyn ońtaılandyrý boıynsha baıandama jasady.

-«Oblys bıýdjetine qatysty negizgi mindettiń biri qarjy-qarajatty únemdep, naqty salaǵa ǵana úlestirýdi júıeli túrde júrgizýimiz kerek. El aýmaǵynda jarııalanǵan Tótenshe jaǵdaı men karantın ýaqytynda josparlanǵan barlyq mádenı, sporttyq sharalar, is saparlar, semınarlar, biliktilikti arttyrý kýrstary, memlekettik tapsyrystardyń kólemderi azaıtyldy. Aldaǵy ýaqytta da «az shyǵyn, kóp kiriske kóńil bólýimiz qajet. Ońtaılandyrýdy naqty iske asyrýdy ózimizden bastap, shyǵyny kóp qyzmettik kólik, oblystaǵy merekelik-mádenı sharalardy qysqartý jáne úkimettiń balansyndaǵy ǵımarattardy uqypty ári tıimdi paıdalaný sekildi únemdeýge beıimdelýimiz kerek», dedi, aımaq basshysy. Oblystyń qazirgi bıýdjet kólemi 160 mlrd.teńgeni qurap otyr, onyń tolyq oryndalysyn qamtamasyz etý úshin áli de ońtaılandyrý jumystary jalǵasady. Qala, aýdan ákimderi men oblystyq basqarma basshylaryna da osyndaı mindet júktelgen.
-«Búgingi tańda jergilikti bıýdjet kiristeriniń 70%-ǵa jýyǵyn munaı kompanııalarynan túsetin túsimder quraıtyndyǵyn eskersek, bul bizge munaıdan basqa da salalardy damytýǵa nazar aýdarý qajet ekendigin ańǵartady. Sondyqtan biz munaı shıkizatyna táýeldilikti azaıtý baǵytynda, negizgi aksentti shıkizattyq emes sektordy damytýǵa baǵyttadyq» dedi S.Trumov. Sonymen qatar, jıynda óńirdegi orta jáne shaǵyn bıznes, densaýlyq saqtaý salasy qatysty oı aıtyldy.
Búginde medısınalyq qyzmet sapasyn arttyrý baǵytynda arnaıy jospar jasaqtalǵan. Bıylǵy jyly Aqtaý qalasyndaǵy onkologııalyq ortalyqtyń jáne Jańaózen qalasynda 50 tósek ornyna arnalǵan medısınalyq ortalyǵynyń qurylysy aıaqtalyp, qoldanysqa beriledi. Sonymen qatar, Jańaózen qalasyndaǵy jańa jedel-járdem stansııasy (týberkýlez aýrýhanasy qaıta jasaqtalyp) jáne Qyzylsaı aýylynda dárigerlik ambýlatorııa qoldanysqa beriledi. Kópten beri sheshimi tabylmaı júrgen ózekti másele, ol – Munaıly aýdanyndaǵy ortalyq aýrýhana qurylysy. Atalǵan jobany tezdetý úshin Úkimet qaraýyna usynyldy. Sondaı-aq, qosymsha jańa medısınalyq nysandardy salýǵa jeke ınvestorlardy tartý jumysta júrgizilýde. Mysaly, Aqtaý qalasyndaǵy 1 shaǵyn aýdandaǵy burynǵy Ishki ister qyzmetkerlerine arnalǵan emhanany jáne 37 shaǵyn aýdandaǵy emhana salýǵa belgilengen jerge jeke ınvestor arqyly júrgiziletin bolady.
Maman tapshylyǵyn sheshý úshin jyl saıyn grant beriledi. Qazirgi tańda joǵary oqý oryndarynda 522 medısına mamany oqytylýda. Mamandardyń barlyǵy óńirge kelip jumys jasaıtyn bolady.
Budan bólek, qajet mamandar basqa da óńirlerden shaqyrtylýda. Olar úshin Munaıly aýdanyndaǵy jataqhanadan 30 bólme beriledi, sondaı-aq Jańaózen qalasynda densaýlyq saqtaý salasynyń qajet mamandaryna 15 páter satyp alyndy. «Dıplommen aýylǵa» baǵdarlamasy iske qosylǵannan beri 412 mamanǵa úı satyp alýǵa nesıe berildi.
Shaǵyn jáne orta bıznes. Búgingi tańda óńirde bul sala boıynsha 53 myńǵa jýyq sýbekt jumys istep, 120 myńnan astam adam eńbek etedi.
Karantın rejımi kezinde shaǵyn jáne orta bıznes ókilderine aýyr salmaq túskendigi belgili. Osyǵan baılanysty, oblys boıynsha jyl sońyna deıin 17 myńǵa jýyq shaǵyn jáne orta bıznes sýbektileri salyqtan bosatyldy.
«Bıznestiń jol kartasy-2025» bıznesti qoldaý men damytý memlekettik baǵdarlamasy aıasynda 200 jobanyń syıaqy mólsherlemesin sýbsıdııalaý arqyly kásipkerlerdiń nesıe paıyzyn arzandatý men 130 jobany kepildendirý, «Eńbek» baǵdarlamasy aıasynda 346 jobaǵa qoldaý kórsetý josparlanýda.