Baqytjan Saǵyntaev shahardaǵy ındýstrıaldy aımaqta ornalasqan jylyjaı men shujyq óndiretin zaýytta boldy

Karantın ýaqytynda almatylyqtardy áleýmettik mańyzy bar azyq-túlikpen qoljetimdi baǵada qamtý qala ákimdiginiń basty nazarynda boldy. Osy sebepti de kúndelikti qajetti kókónis pen azyq-túlik óndirisi bir sátke de toqtaǵan emes, dep habarlaıdy ákimdiktiń baspasóz qyzmeti.

Tek, sanıtarlyq normalar qatań tártippen saqtalǵan. Búgin qala ákimi Baqytjan Saǵyntaev shahardaǵy kásiporyndardy aralaý barysynda ındýstrıaldy aımaqta ornalasqan jylyjaı men shujyq óndiretin zaýytta boldy.

2016 jyly iske qosylǵan bul jylyjaı, qazirgi tańda jylyna 7 myńnan astam tonna ónim ósirýge qaýqarly. Onyń basym bóligi – qyzanaq pen qııar. Gollandııalyq tehnologııa boıynsha ósiriletin ónimderdiń sapasy kez kelgen sheteldik kókónisten kem túspeıdi. Jylyjaı bolǵandyqtan munda sanıtarlyq normalar karantınge deıin de qatań ustanylatyn.      

12 gektar aýmaqty alyp jatqan bul jylyjaıda qyzanaqtyń 8 túri ósiriledi. Kúnine 20 tonna ónim óndire alatyn bul jylyjaı Tótenshe jaǵdaı kezinde, karantın kezinde de jumysyn bir mezetke de toqtatqan joq. Sebebi Almatyda bólek, búkil Qazaqstandy azyq-túlik qamtamasyz etý jáne baǵa saıasatyn ustaný birinshi kezekte bolatyn.     

Jobanyń jalpy quny 7,8 mlrd teńge. Munda tyńaıtqyshtar men mıneraldardy avtomatty túrde sebetin tamshylatyp sýarý júıesi qoldanylady. Almatylyqtardy úzdiksiz kókónispen qamtý úshin kásiporyn jumysshylardyń qaýipsizdigine basty nazar aýdardy.  

«Jumysshylarǵa keletin bolsaq, bizde 180 adam jumys isteıdi. Onyń 50 adamy oblystan keletin edi. Karantın kezinde 50 adamdy Almaty qalasyna jaıǵastyrdyq. Bas mamandarǵa páter jaldap berdik. Qalǵandaryna jataqhana uıymdastyrdyq. Úsh ýaqyt tamaǵy boldy. Karantınge deıin kúnine bir mezgil ystyq tamaq berilip kelse, karantın ýaqytynda 3 ýaqyt tamaq berildi. Alyp barý, alyp kelýdi de uıymdastyrdyq», – dedi jylyjaı kesheniniń dırektory Nurlan ÁDILHAN.

Almatyny azyq-túlikpen qamtamasyz etetin kelesi óndiris orny – «Bıjan» et óńdeý zaýyty. 2 jyl buryn ındýstrıaldy aımaqtan 3 gektardan astam jerde jańa zaýyttyń qurylysyn bastaǵan bolatyn. Endi mine jańa zaýyttyń tusaýy kesilip, kúnine 20 tonnaǵa jýyq et ónimderin shyǵarmaq. Eýropalyq standartqa saı bul óndiris orny joǵary sapaly shujyqtardyń 100-den astam túrin shyǵarady.  

– Qalanyń saýda sóreleriniń barlyǵynda bizdiń taýarlarmen qamtamasyz etilip turdy. Jańa soıylǵan maldyń eti, shujyq ónimderi, jartylaı fabrıkattar, delıkatestermen qamtamasyz etilip turdy. Bizdiń dúkenderimiz arqyly jáne qalanyń saýda dúkenderiniń barlyǵynda boldy. Qazir endi tolyq quramda jumys jasap jatyrmyz», – dedi et óńdeý zaýytynyń bas dırektory Hadısha BIJAN.

Kompanııanyń basty ónimderi shıki jáne pisirilip ystalǵan, delıkates ettermen jáne jylqy etinen daıyndalǵan ulttyq ónimder, sonymen qatar tutynýshylarǵa jańa soıylǵan et usynady. 250 adamdy jumyspen qamtyp otyrǵan zaýyt karantın kezinde de jumys istedi.

- Biz bir kún toqtamaı jumysymyzdy jasap jatyrmyz. Jáne de halyqty kerekti et ónimderimen qamtamasyz etip jatyrmyz. «Bıjan» kompanııasynyń ónimderi taza, barlyq sanıtarlyq normalar oryndalyp jatyr. Sol sebepti ózim aýyryp qalamyn dep qoryqpaımyn, –  dedi seh qyzmetkeri  Ádilet SERIKQULOV.

Aıta ketý kerek, ındýstrıaldy aımaqta, 2019 jyly jalpy somasy 67 mıllıard teńge bolatyn 12 kásiporyn paıdalanýǵa berildi. Tıisinshe, 1700 jumys ornyn quryldy. Al, bıyl 1600 jumys ornymen 11 jańa jobany iske qosý josparlansa, kelesi jyly 23-i joba qyzmetin bastaıdy.