Baýyrjan Baıbek Elbasyǵa praımerızge daıyndyq týraly baıandady

Usynylǵan aqparatqa sáıkes, «Birgemiz» qorynyń qarajaty esebinen 360 myńnan astam otbasyǵa 50 myń teńge kóleminde birjolǵy kómek kórsetilip, 240 myń otbasyǵa qajetti azyq-túlik jetkizildi. Budan bólek elordanyń jáne Almaty qalasynyń medısınalyq mekemelerinde jumys isteıtin 2100-den astam qyzmetkerge birjolǵy tólem jasaldy.

Sondaı-aq «Birgemiz» qorynyń qarajatynan Maqtaaral aýdany Dostyq aýylynyń turǵyndaryna baspana salý maqsatynda 340 mıllıon teńge bólindi. Sonymen qatar partııa belsendileri men eriktileri bir myń tonnadan astam gýmanıtarlyq kómek jınap, zardap shekken eldi mekenderdiń turǵyndaryna jiberdi.

Atqarylyp jatqan jumystyń mańyzdylyǵyn aıta kele, Elbasy «Birgemiz» qory arqyly elimizdiń shaǵyn qalalary men aýyldaryndaǵy muqtaj adamdarǵa qoldaý kórsetýdi jalǵastyrýdy tapsyrdy.

– Tótenshe jaǵdaı kezinde «Jas Otan» búkil el boıynsha bes myńnan astam eriktini jumyldyrdy. Olar demalyssyz jumys istep, muqtaj adamdarǵa kómek jetkizdi. Naǵyz patrıottardyń, jaýapkershiligi mol jas kóshbasshylardyń jańa býyny qalyptasqany qýantady. Olardyń eń belsendilerine arnalǵan alǵys hattarǵa qol qoıdym, – dedi Nursultan Nazarbaev.

Qazaqstannyń Tuńǵysh Prezıdenti halyqtyń partııaǵa degen senimin nyǵaıtý jumysyn jalǵastyrýdy tapsyrdy.

– «Nur Otan» – naqty ister partııasy. Men qoǵamdyq qabyldaýlarǵa kelip túsken hattardyń sany jeti ese ulǵaıǵanyn jáne sheshilgen máselelerdiń de artyp kele jatqanyn kórip otyrmyn. Bul halyqtyń partııaǵa degen seniminiń kórinisi. Osy jumysty odan ári kúsheıtý kerek, – dedi Elbasy.

Kezdesý barysynda B.Baıbek Elbasyna óńirlerge jasaǵan jumys saparlarynyń nátıjeleri, partııanyń saılaýaldy baǵdarlamasynyń oryndalý barysy jáne praımerızge daıyndyq týraly baıandady.

– Qazirgi tańda 10 myń partııa múshesinen quralǵan kadrlyq rezerv jasaqtaldy. Praımerız erejeleri áıelder men jastarǵa arnalǵan kvotalardy eskere otyryp bekitildi. Partııa óz músheleri arasyndaǵy irikteýdi ekinshi jartyjyldyqqa josparlap otyr, – dedi «Nur Otan» partııasy Tóraǵasynyń birinshi orynbasary.