Shymkenttegi tóbelesten keıin 17 jastaǵy jasóspirim qaıtys boldy

Shymkentte jappaı tóbeles kezinde taıaq jep, komaǵa túsken 17 jastaǵy Abzal О́tkirov bas mı jaraqatynyń aýyrlyǵynan, es jımaǵan kúıinde qaıtys boldy, dep habarlady QazAqparat.

A. О́tkirov Túrkistan oblystyq balalar aýrýhanasynyń jansaqtaý bólimine aýyr halde jetkizilgen bolatyn.

"Naýqas 23-shi mamyr kúni túngi saǵat 01:55-te medısınalyq jedel-járdem qyzmetimen aýyr halde jetkizilgen. Naýqas aýyr jaraqat alǵan bolatyn. Aýrýhana dárigerleri jedel túrde naýqasty tıisti medısınalyq tekserýden ótkizip, zertteýler júrgizdi. Naýqastyń mıyna qan ketkeni anyqtaldy. Jedel túrde ota – dekompressıvti trepanasııasy jasalyndy. Naýqasqa alǵan jaraqatyna jáne jaǵdaıynyń aýyrlyǵyna baılanysty qajetti em jansaqtaý bóliminde kórsetilgen. Ony uzaq jolǵa alyp shyǵý qaýipti bolǵandyqtan, dárigerler Ulttyq ǵylymı ortalyǵynyń mamandarynan telemedısına arqyly keńes alyp, emdik sharalardy jasady. Alaıda 1-shi maýsym túngi saǵat 23:45-te jasóspirim kóz jumdy. Komada jatqan kúıi es jımaı qaıtys boldy",  delingen basqarma habarlamasynda.

Aıta keteıik, buǵan deıin marqumnyń týystary 22 mamyr kúni Shymkenttiń irgesindegi Maıatas eldimekeninde jappaı tóbeles bolǵanyn aıtqan. Onda bolǵan eki jasóspirim soqqy alyp, 17 jastaǵy jasóspirim aýyr jaraqatpen aýrýhanaǵa túsken.

Qazirgi tańda Shymkenttiń polısııa departamenti tóbeleske baılanysty qylmystyq is qozǵap, tergeý amaldaryn júrgizýde.