Eraly Toǵjanov: Memlekettik qoldaý kórsetýdi tapsyrýyńyzdy suraımyz

Memleket tarapynan sýbsıdııalanatyn jumys oryndarynyń kólemi 90 myńnan 211 myńǵa artty. Bul týraly Úkimet otyrysynda QR Premer-Mınıstriniń orynbasary Eraly Toǵjanov aıtty, dep habarlaıdy QazAqparat tilshisi.

– Jumyspen qamtý máselesi arnaıy qurylǵan vedomstvoaralyq komıssııanyń 6 otyrysynda qarastyrylǵan bolatyn. Memlekettik organdarǵa, óńirlerge 50-den astam naqty tapsyrma berildi. Onyń ishinde búkil kemshilikke baılanysty tapsyrmalardy óńirler aldy. Jalpy, Jumyspen qamtý jol kartasy boıynsha jobalardyń tórtten biri bilim salasyndaǵy nysandarǵa qatysty. Onyń ishinde 1 400-ge jýyǵy mektep, balabaqsha, ınternattardy quraıdy, – dedi ol.

Onyń atap ótýinshe, jobalarǵa 50 paıyz qyzmetkerlerdi jumyspen qamtý ortalyqtary arqyly tartý talaby tolyq oryndalyp otyr. «Eńbek» baǵdarlamasy aıasynda 6 myńnan astam mıkrokredıt pen grant berilip jatyr. Onyń ishinde 30 paıyzyn az qamtylǵan jáne kópbalaly otbasylar, múgedektigi bar azamattar jáne jastar quraıdy. Memleket tarapynan sýbsıdııalanatyn jumys oryndarynyń kólemi 90 myńnan 211 myńǵa ósip otyr.

– Asqar Uzaqbaıuly, halyqty jumyspen qamtý maqsatynda tıisti memlekettik organdar men ákimdikterge birinshiden, jumyspen qamtý aıasyndaǵy memlekettik baǵdarlamalardaǵy tetikterdi tıimdi isse asyrýdy, ekinshiden árbir jumystan bosatylǵan azamatpen jumys jasap, memlekettik qoldaý kórsetýdi, úshinshiden, memleketten bólinip jatqan qarajatty maqsatty túrde paıdalanýdy qamtamasyz etýdi tapsyrýyńyzdy suraımyz, – dep ótindi Eraly Toǵjanov Premer-Mınıstr Asqar Mamınnen.