Qordaı dúngenderi "tergeý ádiletsiz ótip jatyr" dep úndeý jasady

Jambyl oblysy Qordaı aýdanyndaǵy etnıkalyq dúngender tergeý amaldary men kelgen zalaldyń ornyn toltyrý ádil júrmeı jatqanyn aıtyp, úndeý jasady, dep jazady kaztag.kz.

Olardyń sózinshe, Qorǵaıdaǵy konflıktten beri úsh aı ótse de moraldyq shyǵyndy aıtpaǵanda, materıaldyq shyǵyn ornyn toltyrý máselesi sheshimin tappaǵan. Barlyq derlik turǵyndar dúnıe-múlkinen aıyrylǵanyna qaramastan, kompensasııalyq tólemder ótelmegen.

Aýyl turǵyndary janjal uıymdastyrýshylary men qatysýshylardan bólek, aýyldy qorǵaǵan azamattardy da tergeý organdary aıyptalýshy esebinde tergep jatqanyn aıtýda.

Úndeý jasaǵandar birneshe turǵynnyń tergeý organynda moraldyq, psıhologııalyq jáne fızıkalyq qysym kórip jatqanyn málimdedi. Olardyń sózinshe, ózi men otbasyn qorǵaǵan azamattardy da isti qylýǵa tyrysyp jatyr.

"Aýyldy qorǵap, túrli jaraqat alǵandardy shaqyrý qaǵazynsyz alyp ketip, qushyrlana jaýapqa alyp jatyr. Qaıtys bolǵan Lohash Lýgmardyń anasyn qorqytqany sonsha, qysymy kóterilip, dárigerler zorǵa qutqaryp qaldy. Onyń úıine qandaıda bir qujat kórsetpesten masqa taqqan 12 adam túngi 23:30 jetip kelgen. Marqumnyń anasy 73 jasta. Al Iаsyr Hýsezovtyń anasy balasy tutqyndalyp, azaptalǵan túni qaıtys boldy. Balalardy qabirdi ashamyz dep qorqytqan soń, olar aryz jazýdan bas tartqan" delingen úndeýde.

Bas prokýratýranyń arnaıy prokýrorlar qyzmetiniń basshysy Rızabek Ojarov kez kelgen úndeý jeke qaralyp, nazardan tys qalmaıtynyn málimdedi.

Al Jambyl oblysy ákiminiń orynbasary Erjan Jylqybaev etnıkalyq dúngenderdiń shyǵyndardy óteý týraly taratqan aqparaty jańsaq ekenin aıtty.

"Birinshiden, zardap shekken 39 otbasyǵa 44 mln teńge kóleminde kómek kórsetildi. Budan bólek asyraýshysynan aıyrylǵan otbasylardaǵy balalarǵa kámilettik jasqa tolǵanǵa deıin aı saıyn 55 myń teńgeden beriledi. Jóndeý jumystary demeýshiler esebinen júrip jatyr. Bul úshin arnaıy qor qurylǵan. Qarajat jetkilikti. Búginde 65 nysannyń 54-inde jumys júrýde. 11 nysanda jumys júrgizilip jatqan joq. О́ıtkeni nysandardy salýda zań talaptary saqtalmaǵan, ári ol úıler "qyzyl syzyqta" turǵyzylǵan. Qujattary da joq. Másele komıssııa qaraýynda jatyr. Tıisti sharalar keıinirek qabyldanady. Barlyǵy zań sheńberinde bolýǵa tıis. 103 úıdi turǵyndar ózderi qalpyna keltirip jatyr. Ol úılerge terezeniń shaǵylýy syndy usaq zalal kelgen. Úı ıeleri "qarjy taýyp berseńder, ózimiz jasap alamyz" degen soń demeýshiler aqshasynan olarǵa qarjy bólinip berildi. Qazir atalǵan úılerde qurylys aıaqtaldy. Qalǵandaryn tamyzdyń sońyna deıin bitiremiz" dedi Erjan Jylqybaev.