17 myńnan astam shaǵyn jáne orta bıznes ókilderine jeńildikter berildi

Búgingi tańda, Qazaqstan Respýblıkasy Úkimetiniń ekonomıkalyq ósýdi qalpyna keltirý jónindegi keshendi jospary qabyldandy.

S.Trumovtyń aıtýynsha Tótenshe jaǵdaı kezeńinde Úkimet tarapynan qabyldanǵan qoldaý sharalary Mańǵystaý oblysynda áleýmettik-ekonomıkalyq turaqtylyqty saqtaýda óz nátıjesin berip otyr. Barlyq áleýmettik kómek, eńbekaqy, tıisti qoldaýlar ýaqytyly júrgizilýde. Onyń ishinde medısına salasynyń qyzmetkerlerine de memleket basshysynyń tapsyrmasyna sáıkes tólemder de der kezinde berilýde.

- buǵan deıin aıtylǵandaı tabys kózin joǵaltqan 153 myńnan astam adamǵa 42 500 teńgeden memlekettik qoldaý tólendi;

- «Biz birgemiz» partııalyq qaıyrymdylyq jobasy aıasynda 13 myńnan astam januıaǵa 50 myń teńgeden kómek berildi jáne bul shara ári qaraı da jalǵasatyn boldy;

- Az qamtylǵan otbasylar úshin sáýir, mamar aılaryndaǵy kommýnaldyq qyzmetterge tólemderin óteýge 2,2 mlrd. teńge qarjy qarastyryldy;

- Jumyspen qamtý sharalaryna da Úkimet tarapynan qoldaý kórsetilip, «Jumyspen qamtýdyń jol kartasy» qabyldandy. Baǵdarlama aıasynda óńirde 144 joba iske asyrylyp, 8 500 jumys orny qurylatyn bolady,-dedi oblys ákimi.

Úkimet tarapynan kásipkerlik salasyna da aıtarlyqtaı qoldaý sharalary kórsetilýde.

Týrızm, qoǵamdyq tamaqtandyrý jáne qonaq úı qyzmetteri salasyndaǵy kásipkerler múlik salyǵynan bosatyldy. Mıkro, shaǵyn jáne orta kásipkerlik sýbektileri úshin barlyq salyqtar boıynsha tólemder merzimi uzartyldy.

Jalpy alǵanda, oblys boıynsha jyl sońyna deıin 17 myńnan astam shaǵyn jáne orta bıznes ókilderine salyq alymyna jeńildikter berilip otyr.

Mańǵystaý oblysynyń ekonomıkasy munaı salasyna tikeleı táýeldi ekeni belgili. Qazirgi tańda álemdik naryqtaǵy munaı baǵasynyń turaqsyzdyǵy bizdegi munaı óndirýshi iri kompanııalardyń qyzmetine de keri áserin tıgizýde. Sondyqtan biz munaı shıkizatyna táýeldilikti azaıtý baǵytynda ekonomıkany ártaraptandyrý, shıkizattyq emes salalardyń damýyna tyń serpin beretin negizgi baǵyttardy aıqyndadyq. Olar – óńdeý ónerkásibi, agroónerkásip kesheni, servıstik ekonomıka, onyń ishinde týrızm, saýda, kólik-logıstıkasy. Atalǵan salalardyń negizgi damý baǵyttary boıynsha arnaıy jospar jasaqtalyp, ár baǵyt boıynsha jyl sońyna deıin qol jetkizilýi tıis mejeler belgilendi.

«Atalǵan indet órshigen kezde biraz másele qoǵam ókilderiniń belsene qatysýymen jáne eren eńbekteriniń arqasynda sheshimin tapty. Sonyń ishinde medısına men quqyq qorǵaý organdary jáne qorǵanys salasy qyzmetkerleriniń eńbekterin erekshe aıtqym keledi. Sonymen birge, volonterlarymyzdyń tabandylyǵynyń, jýrnalısterimizdiń jigeriniń jáne kommýnaldyq qyzmetkerlerimizdiń adal jumysynyń arqasynda, eń bastysy halqymyzdyń birligi men tártibiniń jáne birlesken jumysynyń arqasynda qaýiptiń betin qaıtara bildik», - dedi aımaq basshysy.

Sóz sońynda S.Trumov saqtyq sharalarynyń mańyzdylyǵyn aıtyp, oblys turǵyndaryn karantın rejımi talaptaryn qatań saqtaýǵa shaqyrdy.