"Ol meniń kúıeýimmen birge túngi aýysymǵa shyǵatyn". Marqum polıseıdiń áıeli pikir bildirdi

Almatydaǵy № 4 blokpostaǵy jol kólik oqıǵasynyń saldarynan qaıtys bolǵan polısııa qyzmetkeriniń biri Dastan Abdyqanovtyń áıeli Dınara Abdyqanova ZTB instagram paraqshasyna bildirgen pikirinde kúdikti – BMW kóliginiń júrgizýshisi marqum kúıeýiniń áriptesi bolǵanyn aıtty.

Buǵan deıin Almatynyń polısııa departamenti júrgizýshiniń polısııa sapynda istegenin rastaǵan.

"Jan túrshigerlik jol-kólik oqıǵasyn jasaǵan júrgizýshi buǵan deıin polısııa shenin taqqany ras. Ol polısııada 6 jyl jumys istep, qyzmettik mindetin durys atqarmaǵandyqtan 4 márte táptiptik jazaǵa tartylǵan. Artynsha ishki ister organynan shyǵarylǵan. Alaıda ol budan keıin de durys qorytyndy shyǵara almapty. Zańdy buzyp, aýyr saldaryn bile tura mas kúıinde rólge otyryp, qulmys jasady" degen Almaty polısııa departamentiniń bastyǵy Qanat Taımerdenov.

Onyń aldynda polısııa departamentindegiler kúdiktiniń polısııada istegenin joqqa shyǵarǵan. Departamenttegiler bastapqydaǵy mundaı pikirdi tıisti aqparattyń kelip túspegenimen túsindirdi.

Sondaı-aq jelide "kúdiktiniń ákesi de polıseı bolǵany, onyń jýyrda ǵana zeınetke shyqqany" týraly aqparat taraýda.

Shamsharhan О́mirzaqov atty jeli qoldanýshysy kúdikti oqıǵa bolǵan kezde polısııa formasynda bolǵan bolýy múmkin dep sanaıdy. О́ıtkeni kúdikti ustalǵan sátte túsirilgen sýretterde ol jalańash jatyr.

Búginde kúdiktige qatysty eki nemese odan da kóp adamdy óltirgeni úshin QR QK 99-babynyń 2-bóligi boıynsha sotqa deıingi tergeý bastalǵan.

25 mamyr kúni tańǵa jýyq Almatydaǵy № 4 blokbekette BMW júrgizýshisi mas kúıinde beton qorshaýǵa soǵylyp baryp, ınersııamen patrýldik polısııa kóligin soqqan. Jol-kólik oqıǵasynan eki polısııa qyzmetkeri kóz jumdy. Taǵy bir polıseıdiń jaǵdaıy aýyr.