Elordada kóshe saýdasyna jáne úıge qonaqqa shaqyrýǵa tyıym salyndy

Elordada karantın aıaqtalǵanǵa deıin serýendeý kemesiniń jumysyna, kóshe saýdasynyń kez kelgen túrine, otbasylyq eske alý, ádet-ǵuryp jáne ózge de is-sharalar ótkizýge, keıterıng jáne merekelerdi uıymdastyrý qyzmetin kórsetýge tyıym salyndy. Bul týraly Nur-Sultan qalasynyń Bas memlekettik sanıtarlyq dárigeri Janna Piráıevanyń qaýlysynda kórsetildi, dep habarlaıdy QazAqparat.

Qaýlyda aıtylǵandaı, jobamen 50 adam otyratyn orny bar dámhana men meıramhanalardyń jumysyna ruqsat etilgen, biraq ujymdyq is-sharalar ótkizýge jáne banket pen saltanatty zaldardyń jumysyna tyıym salynady.

"Sanıtarlyq-epıdemıologııalyq talaptar men karantındik rejımdi saqtaı otyryp, bilim berý ortalyqtarynyń, ártúrli sala mamandaryn daıarlaý kýrstarynyń, semınar sabaqtarynyń, eresekterge arnalǵan úıirmelerdiń qyzmetine ruqsat etilsin. Tek jeke sabaqtar bolýy kerek nemese toptaǵy adam sany beseýden aspaýy shart" delingen qujatta.

Sondaı-aq, serýendeý kemesiniń jumys isteýine, kóshe saýdasynyń kez kelgen túrine tyıym salynǵan.

QR Densaýlyq saqtaý mınıstrliginiń Taýarlar men kórsetiletin qyzmetterdiń sapasy men qaýipsizdigin baqylaý komıtetiniń Nur-Cultan qalasyndaǵy departamenti qalada koronavırýs ınfeksııasy taralýynyń aldyn alý jónindegi qosymsha shara qabyldady.

"Qala turǵyndaryna karantın aıaqtalǵanǵa deıin 2 jáne odan da kóp adamnyń birlesip serýendeýi kezinde mindetti túrde maska kııý jáne 2 metrden kem emes áleýmettik qashyqtyqty saqtaı otyryp, úıinen erkin shyǵýǵa ruqsat etiledi. Aýla, saıabaq, alań, skver, jaǵalaýda serýendegende maskany mindetti túrde kııý kerek, 3 adamnan artyq toptasy júrmeýi kerek. Bul bir otbasy múshelerine qatysy joq. Sondaı-aq saıajaı ýchaskesine (qala syrtyndaǵy úılerge) barý úshin qaladan kirýge/shyǵýǵa ruqsat etiledi" delingen qaýlyda.

Sondaı-aq, qoǵamdyq orynda, qoǵamdyq kólikte jáne ruqsat etilgen obektilerge barǵan kezde maska, qolǵapty kıip júrý jáne antıseptık paıdalaný talaptaryn qatań saqtaý qajet. Úıge qonaq shaqyrý, bolmasa tabıǵat aıasynda merekelik shara ótkizýge bolmaıdy.

"Otbasylyq eske alý, ádet-ǵuryp jáne ózge de is-sharalar ótkizýge, keıterıngtik qyzmetter kórsetýge jáne merekelerdi uıymdastyrý jóninde qyzmetter kórsetýge tyıym salynady" delingen qujatta.

Kásipkerler men uıymdarǵa qyzmetkerleriniń, kelýshilerdiń karantın talaptary, shekteý sharalaryn saqtaýyn qatań baqylaýy mindettelgen.