Berdibek Saparbaev 3 ákimge sógis jarııalady

Berdibek Saparbaev Taraz qalasy men Baızaq jáne Talas aýdandarynyń ákimderine karantın rejımin tıisti dárejede qamtamasyz etpegeni úshin sógis jarııalady.

Jambyl oblysy boıynsha jedel shtabtyń kezekti otyrysynda koronavırýs ınfeksııasy boıynsha epıdemıologııalyq ahýal barysy talqylandy. Statıstıkaǵa sáıkes, aımaqta COVID-19 aýrýynyń ósýi baıqalýda.

- О́kinishke oraı, oblysymyzda koronavırýstyq ınfeksııanyń taralýy jalǵasýda. Sońǵy 10 kúnniń ishinde 30 jańa jaǵdaı anyqtaldy. Bul jergilikti aldyn-alý jumystarynyń álsizdigin jáne karantındik sharalardyń tıisti deńgeıde saqtalmaı otyrǵandyǵyn kórsetedi.  Ekonomıkalyq qajettilikke baılanysty shaǵyn jáne orta bıznestiń keıbir salalarynyń qyzmetine shekteýler alynyp tastaldy. Degenmen bul qaýipsizdik sharalaryn elemeýge bolady degendi bildirmeıdi. Karantındik rejımniń talaptary saqtalýy kerek jáne oǵan barlyǵy mindetti. Alaıda, Taraz qalasy men aýdan ortalyqtarynda kóptegen turǵyndar qorǵanysh medısınalyq maskalaryn paıdalanbaýda, al saýda oryndary men basqa da nysandarda azamattardyń qaýipsizdigin qamtamasyz etý boıynsha tıisti talaptar oryndalmaı otyr. Aıtalyq, Talas jáne Baızaq aýdandarynda bir jerde adamdardyń kóp jınalýyna qatys jaǵdaıdyń saldarynan aýrýshańdyqtyń ósýi oryn alǵan, - dedi oblys ákimi Berdibek Saparbaev.

Oblystyq taýarlar men qyzmetterdiń sapasyn jáne qaýipsizdigin baqylaý departamentiniń basshysy Berik Jarqynbekovtiń aıtýynsha,  aǵymdaǵy jyldyń 24 naýryzynan 21 mamyryna deıin aımaqta koronavırýstyq ınfeksııanyń 229 jaǵdaıy tirkelgen. Onyń basym bóligi Taraz qalasy men Qordaı jáne Baızaq aýdandarynda oryn alǵan. Buǵan deıin aýrýdyń óńirimizge syrttan ákelý jaǵdaılary kóbirek baıqalsa, sońǵy kezderi jergilikti turǵyndar arasynda juqtyrý deregi ósip otyr. Mundaı oqıǵalardyń joǵary úles salmaǵy oblys ortalyǵynda jáne Baızaq aýdanynda anyqtalǵan. 21 mamyr kúngi jaǵdaıǵa sáıkes, oblys boıynsha aýrýshańdyqtyń ósý deńgeıi táýligine 5,4 paıyzdy, al sońǵy 7 kúnde – 17,4 paıyzdy quraǵan.

 Departament basshysy aýrýdyń kóbeıýiniń negizgi sebepteri retinde kásipkerlik pen saýda nysandaryna adamdardyń jınalýy, maskalyq rejımniń buzylýy, áleýmettik qashyqtyqtyń saqtalmaýy, adamdardyń ózderi men ózgelerdiń densaýlyǵyna nemquraılylyq tanytýlaryn atap ótti.

Máselen, sońǵy kúnderi Talas aýdanynda koronavırýstyq ınfeksııanyń alty oqıǵasy tirkeldi desek, alǵashqy naýqas (nólinshi jaǵdaı) ortalyq aýdandyq aýrýhanaǵa jatqyzý kezinde belgili bolǵan. Zerthanalyq zertteý  barysynda ol naýqaspen baılanysta bolǵan tórt adamnyń KVI juqtyrǵandyǵy anyqtalǵan. Aýdandaǵy kelesi ınfeksııa Qarataý turǵynynan tabylǵan.

Oblystyq densaýlyq saqtaý basqarmasynyń basshysy Marat Jumanqulovtyń aıtýynsha, oblystyń 36 eldi mekeninde koronavırýstyq ınfeksııa anyqtaldy. Sońǵy aptadaǵy aýrýdyń kóbeıý deńgeıi Baızaq aýdanynyń Sarykemer aýylynda baıqalǵan. Qazirgi tańda juqpaly aýrýlar aýrýhanasynda 70 naýqas em alýda. 1504 adam dárigerlerdiń baqylaýyndaǵy úı karantınine alynǵan. Emdelip shyqqandardyń sany – 155, qaıtys bolǵandar – 1.

- Ahýal – alańdatarlyq kúıde. Mundaı jaǵdaıda karantın rejımin tikeleı buzýshylarǵa da, jańa ınfeksııa oshaqtarynyń paıda bolýyna jol bergen laýazymdy tulǵalarǵa da qatań sharalar qoldaný qajet. Sanıtarlyq-epıdemıologııalyq qyzmet óz ókilettikterin barynsha batyl paıdalanǵany durys, - dep atap ótti oblys ákimi.

Aımaq basshysy jergilikti atqarýshy organdar men salalyq vedomstvo basshylaryn halyq arasynda túsindirý sharalaryn kúsheıtýge, keıingi kezderi jumystaryn álsiretip alǵan mobıldi toptardyń qyzmetin qaıta jandandyrýǵa shaqyrdy.

- Karantın rejıminiń barlyq talaptary men aımaqtyń jedel shtaby júktegen mindetterdiń qatań saqtalýyn qamtamasyz etý qajet. Negizgi mindet – adamdardyń qaýipsizdigin qamtamasyz etý, jańa ınfeksııa oshaqtarynyń aldyn alý, - dedi B.Saparbaev.

Basqosýda turǵyndar tarapynan tolassyz túsken ótinishterge baılanysty halyqqa qyzmet kórsetý ortalyqtarynyń qyzmetin 25 mamyrdan  qaıta bastaý týraly sheshim qabyldandy. Al, qoǵamdyq kólik qozǵalysyn qalpyna keltirý máselesi dúısenbi kúni ótetin kezekti shtab otyrysynda talqylanbaq.

Sondaı-aq, óz jumysynda jiberip alǵan kemshilikteri úshin Taraz qalasynyń, Talas jáne Baızaq aýdandarynyń ákimderine sógis jarııalanǵandyǵy, sondaı-aq, osy baǵytqa jetekshilik etetin Taraz qalasy ákiminiń orynbasary qyzmetinen bosatylǵandyǵy belgili boldy. Budan bólek, Qordaı, Baızaq jáne Talas aýdandary ákimderiniń orynbasarlarynyń jeke jaýapkershiligi qaralady.

Ol ǵana emes, shtab otyrysynda azamattardyń jekelegen sanattaryna arnalǵan áleýmettik tólemderge qatysty másele de jan-jaqty saralandy. Keıbir ákimderge atalǵan mańyzdy baǵyttaǵy óz jumystarynyń sylbyrlyǵy  úshin syn-eskertpeler estýine týra keldi. Memleket tarapynan qarajat qarastyrylǵanymen, jergilikti jerlerde áleýmettik járdemaqylardy tóleý qarqyny kóńil kóńshitpeıdi.

Oblystyq jumyspen qamtýdy úılestirý jáne áleýmettik baǵdarlamalar basqarmasynyń basshysy Jorabek Baýbekovtiń aıtýynsha, T.Rysqulov aýdanynda azyq-túlik jáne turmystyq jıyntyqpen qamtamasyz etý tólemi bar-joǵy 38 paıyzǵa oryndalǵan. Taraz qalasy jáne oblystyń barlyq aýdandarynda memleket tarapynan ataýly áleýmettik kómekke bólingen qarajat tolyq ıgerilmegen.

Berdibek Saparbaev jergilikti atqarýshy organdardyń basshylaryn áleýmettik qamsyzdandyrý jáne turǵyndardy jumyspen qamtý jaıyna basa nazar aýdarýǵa shaqyrdy. Buǵan jumyspen qamtýdyń jol kartasynyń ınfraqurylymdyq jobalary meılinshe oń yqpalyn tıgizbek. Alaıda, bul baǵyttaǵy jumystardy shırata túsý qajet. Aıtalyq, jospar boıynsha 18 myńnan astam turǵyn jumyspen qamtýdyń ár túrli sharalaryna tartylýy tıis bolsa, búgingi tańda jobalar boıynsha nebary 7 myń adam jumys isteýde.