• USD 468.56

  • EUR 497.56

  • RUB 7.3

  • CNY 67.18

29 Naýryz, 15:39:15
Almaty
+35°

Almaty qalasynyń ákimi Baqytjan Saǵyntaev Qoǵamdyq keńes múshelerimen qaladaǵy epıdemıologııalyq jaǵdaıdy, karantın kezeńinde sanıtarlyq qaýipsizdikti qamtamasyz etý jáne qalanyń qalypty tirshiligi men Exit Strategy ekonomıkasynyń kezeń-kezeńimen qalpyna keltirý josparyn júzege asyrý boıynsha qabyldanyp jatqan sharalardy talqylady.

Beıne-konferens-baılanys rejıminde ótken kezdesýde koronavırýstyq ınfeksııaǵa qarsy is-qımyl jáne epıdemıologııalyq jaǵdaıdy turaqtandyrý sharalary boıynsha máseleler pysyqtaldy.

Almatyda epıdemııaǵa qarsy is-qımyl jumystary 6 qańtarda úsh kezeń boıynsha bastaldy. Infeksııanyń syrttan ákelinýin boldyrmaý maqsatynda qalaǵa keletin barlyq halyqaralyq kirý joldarynda sanıtarlyq-epıdemııalyq baqylaýdy kúsheıtý; epıdemııaǵa qarsy aýqymdy is-sharalar; ınfeksııanyń jasyryn rezervýarlaryn anyqtaý jáne jappaı testileý júrgizý arqyly epıdemıologııalyq jaǵdaıdy tolyq baqylaýdy qamtamasyz etý sııaqty sharalar qabyldandy.

Qaýip tobyndaǵy testileýge jatatyn birinshi kezekte medısınalyq uıymdardyń, quqyq qorǵaý organdarynyń, kommýnaldyq qyzmetterdiń qyzmetkerleri, Ulttyq ulannyń áskerı qyzmetshileri, tynys alý joldarynda sozylmaly aýrýlary bar adamdar jáne respıratorlyq belgileri bar naýqastar kirdi.

Búginde 126 672 test júrgizildi. Sonyń ishinde 102 170 adam PTR ádisimen, 24 502 adam ekspress-testpen tekserildi. Test 1872 adamda oń nátıje kórsetti. Sonyń ishinde 92% profılaktıkalyq skrınıngter kezinde; 1% – syrttan ákelingen jaǵdaılar; 7% – jergilikti jaǵdaılar.

100 myń halyqqa PTR ádisimen zertteý kórsetkishi 4903 zertteýdi quraıdy. Bul damyǵan eýropalyq elderdiń deńgeıine sáıkes keledi. Zerthanalyq qyzmetterdiń barlyq áleýeti iske qosyldy. Zerthanalar sany 2-den 7-ge deıin ósti, mobıldi qorshaý pýnkti ashyldy, 8 jyljymaly qabyldaý pýnktin ashý josparlanýda. Jalpy KVI-ge testileý kólemin kúnine 4500-5000 deıin jetkizý josparlanyp otyr.

Sondaı-aq shahar basshysy B. Saǵyntaev medısına qyzmetkerleri men qala turǵyndaryn áleýmettik jaǵynan qoldaý sharalary týraly da málimdedi. Memleket basshysynyń tapsyrmasyna sáıkes medısına qyzmetkerlerin qoldaýdyń keshendi júıesi quryldy. Medısınalyq mekemeler jeke qorǵaný quraldarynyń jetkilikti kólemimen jáne dezınfeksııalaý quraldarymen qamtamasyz etilgen.

Medısınalyq uıymdarda juqtyrýdyń aldyn alý sharalary qabyldandy. Ol úshin taza jáne las aımaqtardy shekteý úshin arnaıy shlıýzder salyndy. Medısınalyq qyzmetkerlerge ýaqytsha baspana berilip, ystyq tamaq pen kólik uıymdastyryldy.

Naýryz aıynda 3769 medısınalyq qyzmetkerge 1134,8 mln. teńge, sáýir aıynda 4391 medısınalyq qyzmetkerge 1 567,5 mln. teńge ústemaqy tólendi. Nur Otan Almaty Birgemiz partııasynyń qorynan 970 medısına qyzmetkeri 48,5 mln. teńge aldy.

Jıyndaǵy talqylaý barysynda ekonomıkany qalpyna keltirý jáne kásiporyndardyń qyzmetin jańartý, jumys oryndaryn qurý, ShOB-ty qoldaý, áleýmettik máselelerdi sheshý men bilim berý nysandaryn salý, sondaı-aq qala ekologııasyn saýyqtyrý máseleleri kóterildi.

Onlaın-rejımde ótken kezdesý 2,5 saǵatqa sozyldy. Qoǵamdyq keńes músheleri óz eskertýleri men usynystaryn aıtyp, jalpyqalalyq máselelerdi sheshýde belsendi atsalysýǵa daıyn ekendikterin jetkizdi.

"Qamshy" silteıdi

Qate tapsańyz, qajetti bólikti tańdap ctrl+enter basyńyz.

Pikir qaldyrý

pikir