Atyraýda 1,5 jastaǵy bala joǵaldy

Atyraý oblysy Juldyz yqshamaýdanynda 1,5 jastaǵy bala joǵaldy dep habarlady Qamshy.kz aqparat agenttigi azh.kz saıtynyń deregin negizge alyp. 

«Búgin, 20 mamyrda, saǵat 13.30-dar shamasynda «Juldyz» yqshamaýdany 10-kóshedegi №57 úıden 1,5 jastaǵy bala shyǵyp ketken. Esimi Álı, oń aıaǵyn syltyp basady. Balany kórgen-bilgender bolsa, 102 telefonyna habarlasýyńyzdy suraımyz», - dep habarlaıdy polısııa.

Balany izdeý jumystary áli de jalǵasýda. Sol jerde qazir polısııa jumys jasap, sonymen qatar qala men qala mańyndaǵy janashyr turǵyndar jáne eriktiler de jınaldy.

Eriktilerdiń biri Oljas Sultanovtyń aıtýynsha, kórshiniń úıinde ornatylǵan kameradan balanyń aýlada júrgeni, sosyn shyǵyp kele jatqany anyq kórinedi. Sábıdiń anasy birer mınýtqa úıge kirip ketkende, bala aýlada bolǵan. Anasy shyqqan kezde bala joq bolǵan. 

Eriktiler men polısııa qyzmetkerleri dron qoldanyp, úılerdiń aýlasyn tekserip, septık, qudyq, qoqys jáshikteri – bárin qarap shyqqan. Biraq tapqan joq. Áli de izdep jatyr.

Sońǵy aqparatqa sáıkes, sábıdi izdestirýge Juldyz yqshamaýdanynyń 150-den astam  turǵyny, 50 shaqty eriktiler men 20 áskerıler kirisken.