Almaty qalasy ákiminiń orynbasary Erjan Babaqumarov megapolıstiń memlekettik Bas sanıtar dárigeri Jandarbek Bekshın jáne qalalyq Bilim basqarmasynyń basshysy Lázzat Jylqybaevamen birlesip shahardaǵy barlyq jalpy bilim beretin mekteptiń dırektorlarymen kezdesý ótkizdi. Oǵan 205 memlekettik, 61 jekemenshik mekteptiń dırektory qatysty. Bul týraly qala ákimdiginiń baspasóz qyzmeti habarlady.

Kezdesýdiń basty maqsaty – oqý jylyn qorytyndylaý daıyndyǵyn, mektep túlekterin qorytyndy attestattaýdan ótkizýdegi sanıtarlyq-epıdemıologııalyq jáne Biryńǵaı ulttyq testileýdi ótkizýdegi talaptardy, jańa oqý jylynda 1-synypqa qabyldaý daıyndyǵyn talqylaý.

Búgingi kúni Almatyda 261 myń oqýshy bar. Aǵymdaǵy jyly qalada 9299 túlek attestat alady, olardyń ishinde 8667-si memlekettik mektepterdiń túlekteri bolsa, 632-si jekemenshik mektepterdi bitirýshiler.

Qalalyq Bilim basqarmasynyń aqparatyna sáıkes:

• Bilim berý uıymdarynda oqý jyly 25 mamyrda aıaqtalady.
• 9-11 synyp oqýshylary úshin qorytyndy attestattaý ótkizilmeıdi.
• Negizgi orta jáne jalpy orta bilim beretin mektepti bitirgeni jónindegi attestattaý aǵymdaǵy baǵalardyń negizinde júzege asyrylady.
• Orta bilim berý uıymdarynyń basshylaryna elektrondy jýrnaldardaǵy baǵalardy túzeýge úzildi-kesildi tyıym salynady.
• 1-10 synyp oqýshylary úshin saltanatty lıneıkalar qashyqtan ótkiziledi.
• 11-synyp bitirgen túlekterge attestat tabystaý sharalary 3-4 maýsym kúnderi kestege sáıkes barlyq sanıtarlyq-epıdemıologııalyq talaptardy qatań saqtaý arqyly ótedi.

Saltanatty lıneıkalardy ótkizýde, eldegi jáne qaladaǵy epıdemıologııalyq jaǵdaıdy eskere otyryp, tómendegideı sanıtarlyq-epıdemıologııalyq talaptar belgilengen:

• Lıneıkalardy tek bitirýshi synyptar úshin ótkizý jáne oqýshylardyń arasyndaǵy áleýmettik qashyqtyq keminde 2 m kem bolmaýy tıis.
• Attesttardy tek synyptar boıynsha tabystaý, bul sharaǵa oqýshylardy, olardyń ata-analary men pedagogıkalyq ujym ókilderin qosqanda shamamen 60 adamǵa ǵana qatysýǵa ruqsat etiledi.
• Bir synyptyń túlekteri men ekinshi synyptyń túlekterine attestat tabystaý sharalarynyń aralyǵy keminde 1 saǵatty quraýy kerek.
• Túlekterdiń otbasylaryna lıneıkaǵa tek 1-2 ata-ana ǵana kelýine keńes berý.
• Túlekterdiń otbasylaryna olardyń egde jastaǵy atalary men ájelerine lıneıkaǵa kelýden bas tartqany abzal ekenin aıtý.
• Mektepterdiń ákimshilikteri ata-analar komıtetterimen, synyptarmen jáne pedagogıkalyq ujymdarmen túsindirý jumystaryn júrgizý.
• UBT barlyq sanıtarlyq-epıdemıologııalyq talaptardy qatań saqtaı otyryp, ádettegi dástúrli formatta ótetin bolady.

UBT ótkizý týraly:

• UBT Almatyda 20 maýsym men 5 shilde aralyǵynda 8 ótkizý pýnktinde barlyq qaýipsizdik sharalaryn saqtaı otyryp ótkizilmek.
• UBT-ǵa maýsym aıynda 190 memlekettik jáne 49 jekemenshik mektep qatysady.
• Almaty qalasy boıynsha UBT-ǵa 9047 túlek qatysady.

Kezdesý barysynda mektep oqýshylary úshin jazǵy demalys máselesi qalaı bolatyny týraly da qaraldy. Koronavırýs pandemııasy men indetti áli de juqtyrý qaýpi saqtalyp otyrǵanyn eskere otyryp, jıyn qorytyndysynda Almaty qalasynyń mektep oqýshylary úshin qala syrtynan da, mektep janynan da eshqandaı lagerlerdi ashpaý jóninde sheshim qabyldandy.
Qazirgi ýaqytta qala ákimdigi men QR-nyń adam quqyqtary boıynsha ókili Arýjan Saıynmen birlesip qala balalaryn jappaı sport, mádenıet jáne mektepten tys qosymsha bilim berý is-sharalaryna tartý maqsatynda «jol kartasy» ázirlenýde.

1 maýsymnan bastap Almatyda 1-synypqa baratyn jetkinshekterdiń qujattaryn qabyldaý bastalady. Al 15 mamyrdan bastap daryndy balalarǵa arnalǵan mamandandyrylǵan gımnazııalarǵa, lıseılerge qujat qabyldaý bastaldy. Qujattardy onlaın-qabyldaý barysynyń qalaı ótip jatqanyn, sonymen birge, qaýipsizdik erejelerin saqtaı otyryp, qabyldaý emtıhandaryn ótkizýge daıyndyqtary jóninde №165 lıseıdiń dırektory K. Oshanova, «Bilim-Innovasııa» ınternatynyń dırektory G. О́skenbaı, Sh. Ýálıhanov atyndaǵy №12 gımnazııa dıerktory J. Bekjanova, №39 lıseı basshysy N. Málikova, Mahamta Gandı atyndaǵy №92 lıseıdiń dırektory E. Jıenbaev, №126 lıseı dırektory M. Tólendıev baıandady. 

Qate tapsańyz, qajetti bólikti tańdap ctrl+enter basyńyz.

Banner

Pikir qaldyrý

pikir