TJ rejıminen keıin sottar qalaı jumys isteýde?

Joǵarǵy Sot jergilikti sottarǵa TJ rejıminen keıingi jumysty uıymdastyrý týraly hat joldady.

Onda aǵymdaǵy jylǵy 10 mamyrda Bas memlekettik sanıtarlyq dárigerdiń COVID-19 aýrýynyń aldyn alý sharalaryn odan ári kúsheıtý týraly №36 qaýlysy, ınfeksııanyń jappaı taralý qaýpiniń áli de saqtalyp otyrǵany jáne TJ kezeńinde shekteý sharalarynyń jalǵasatyny aıtylǵan.

COVID-19-dy sot ǵımarattarynda juqtyrý qaýpin boldyrmaý jáne kelýshilerge, sýdıalar men qyzmetkerlerge qaýipsiz jaǵdaı jasaý maqsatynda jergilikti sottar Qaýlyny múltiksiz oryndaǵany jón.

Sanıtarlyq-zararsyzdandyrý rejımin kúsheıtý, dene temperatýrasyn ólsheýdi jalǵastyrý, COVID-19 belgileri baıqalǵan azamattardy sot ǵımaratyna kirgizbeý usynyldy.

Sot isin júrgizýge jáne sot jumysyna qatysy joq bógde adamdardyń sot ǵımaratyna kirýine salynǵan tyıym áli de jalǵasatyn bolady. Sebebi azamattardyń sot prosesine tikeleı qatysýy COVID-19-dyń taralý qaýpin eselep arttyrady.

Tótenshe jaǵdaı jónindegi memlekettik komıssııa otyrysynda (10.05.20 j.) Prezıdent qashyqtan jumys isteý formatynyń sátti iske asýy mańyzdy memlekettik sheshimderdi qabyldaý kezinde IT-tehnologııalardy qoldanýdyń tıimdiligin atap ótken bolatyn.

Jınaqtalǵan oń tájirıbeni eskere otyryp, sot jumysy onlaın rejımde jalǵasatyn bolady.

Qylmystyq ister boıynsha sot otyrystaryn taraptardyń qatysýymen sot ǵımaratynda ótkizýge aıryqsha jaǵdaılarda ǵana jol beriledi.

Proseske qatysýshylardyń materıaldardy (isterdi) sotqa elektrondy túrde usynýyn baǵyttaý maqsatynda hat múddeli memlekettik organdarǵa da joldandy.

Shaǵymdar, ótinishhattar men ózge de qujattar «Sot kabıneti» servısi arqyly, al ákimshilik quqyq buzýshylyqtar týraly hattamalar men qaǵaz materıaldar skanerlenip, elektrondy formatta joldanýy qajet.